കാസർഗോഡ്: കാസർഗോഡ് മുള്ളേരിയ കുടുംബാരോഗ്യ കേന്ദ്രത്തിലെ ലാബ് ഉദ്ഘാടന ചടങ്ങിൽ വന്ദേമാതരം പൂർണ്ണമായി ആലപിച്ചതിനെതിരെ മന്ത്രി കെ. മുരളീധരൻ വേദിയിൽ പരസ്യമായി അതൃപ്തി അറിയിച്ചു. ഗാനം പൂർത്തിയാകുന്നതിന് മുൻപേ മന്ത്രി വേദിയിലെ കസേരയിൽ ഇരിക്കുകയും, പിന്നാലെ രാജ്‌മോഹൻ ഉണ്ണിത്താൻ എംപി, കല്ലട്ര മാഹിൻ എംഎൽഎ, ജില്ലാ കളക്ടർ എന്നിവർ ഇരിപ്പിടത്തിലേക്ക് മടങ്ങുകയും ചെയ്തു. അതേസമയം, കെ. നീലകണ്ഠൻ എംഎൽഎ, ഡിസിസി പ്രസിഡന്റ് പി.കെ. ഫൈസൽ എന്നിവർ ഗാനം തീരുന്നതുവരെ വേദിയിൽ എഴുന്നേറ്റു നിന്നു.
ഔദ്യോഗിക പരിപാടികളിൽ വന്ദേമാതരം പൂർണ്ണരൂപത്തിൽ പാടേണ്ടതില്ലെന്ന കോൺഗ്രസ് തീരുമാനത്തിന് വിരുദ്ധമായാണ് ചടങ്ങിൽ ആലാപനം നടന്നത്. ഗാനം മുഴുവൻ പാടാൻ നിശ്ചയിച്ചിരുന്ന കാര്യം സംഘാടകരുടെ ശ്രദ്ധയിൽപ്പെട്ടിരുന്നില്ലെന്നാണ് ലഭിക്കുന്ന വിശദീകരണം.
വേദിയിൽ തന്നെ അതൃപ്തി രേഖപ്പെടുത്തിയ മന്ത്രി, ഉദ്ഘാടന ചടങ്ങുകൾക്ക് ശേഷം സംഘാടകരെ നേരിൽക്കണ്ട് തീരുമാനത്തിലെ അതൃപ്തി വ്യക്തമാക്കിയതായും വിവരമുണ്ട്.
