കൊച്ചി: ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട കട്ടിളപ്പാളി കേസിൽ കോടതിയിൽ കുറ്റപത്രം സമർപ്പിക്കുന്നതിനായി പ്രത്യേക അന്വേഷണ സംഘം (എസ്‌ഐടി) സർക്കാരിന്റെ പ്രോസിക്യൂഷൻ അനുമതി തേടി. അനുമതി ആവശ്യപ്പെട്ട് ദേവസ്വം വകുപ്പ് സെക്രട്ടറിക്ക് ഔദ്യോഗികമായി അപേക്ഷ കൈമാറിയതായും ഉത്തരവ് ലഭിക്കുന്ന മുറയ്ക്ക് ഉടൻതന്നെ കുറ്റപത്രം നൽകുമെന്നും അന്വേഷണ സംഘം വ്യക്തമാക്കി. അതേസമയം, സമാനമായ ദ്വാരപാലക കേസിൽ അന്തിമ കുറ്റപത്രം നൽകുന്നതിനായി എസ്‌ഐടി ഹൈക്കോടതിയിൽ കൂടുതൽ സമയം ആവശ്യപ്പെട്ടു.
ആകെ 285 സാക്ഷിമൊഴികൾ രേഖപ്പെടുത്തിയാണ് കട്ടിളപ്പാളി കേസിലെ കുറ്റപത്രം അന്വേഷണ സംഘം പൂർത്തിയാക്കിയത്. 1998-ൽ സന്നിധാനത്ത് സ്ഥാപിച്ച സ്വർണ്ണം പൂശിയ ദ്വാരപാലക ശില്പങ്ങളും കട്ടിളപ്പാളികളും 2019, 2023 വർഷങ്ങളിൽ അറ്റകുറ്റപ്പണികൾക്കും പുനർനിർമ്മാണത്തിനുമായി ചെന്നൈ ഉൾപ്പെടെയുള്ള സ്ഥലങ്ങളിലേക്ക് കൊണ്ടുപോയ സമയത്ത് സ്വർണ്ണം അപഹരിക്കപ്പെട്ടു എന്നതാണ് കേസിന്റെ അടിസ്ഥാനം.
മുൻ ദേവസ്വം ബോർഡ് പ്രസിഡന്റുമാരായ എ. പത്മകുമാർ, പി.എസ്. പ്രശാന്ത് എന്നിവർ നേരത്തെ എസ്‌ഐടി കസ്റ്റഡിയിലായതും കേസിൽ പ്രതിചേർക്കപ്പെട്ടതുമാണ്. മുൻ ദേവസ്വം ബോർഡ് അംഗം അജികുമാർ, ഉണ്ണികൃഷ്ണൻ പോറ്റി എന്നിവരുൾപ്പെടെയുള്ള മറ്റ് പ്രതികൾ നിലവിൽ ജാമ്യത്തിലാണ്.
