തൃശൂർ: പ്രായപൂർത്തിയാകാത്ത കുട്ടികൾ വാഹനം ദുരുപയോഗം ചെയ്യുന്നതിനെതിരെ മാതാപിതാക്കൾക്ക് കർശന മുന്നറിയിപ്പുമായി ഗതാഗത മന്ത്രി സി.പി. ജോൺ. മക്കളെ നിയന്ത്രിക്കാൻ സാധിക്കുന്നില്ലെങ്കിൽ രക്ഷിതാക്കൾ കൈവശമുള്ള വാഹനം വിറ്റുതുലയ്ക്കണമെന്നും, കുട്ടികൾ വാഹനം ഓടിച്ചാൽ വീട്ടുകാർക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്നും മന്ത്രി വ്യക്തമാക്കി. കുട്ടികളെ മാത്രം കുറ്റപ്പെടുത്തിയിട്ട് കാര്യമില്ലെന്നും അവരെ നേർവഴിക്ക് നടത്തേണ്ട പൂർണ്ണ ഉത്തരവാദിത്തം രക്ഷിതാക്കൾക്കാണെന്നും അദ്ദേഹം കൂട്ടിച്ചേർത്തു.
സ്വകാര്യ ബസുകളുടെ മത്സരയോട്ടത്തിന് പിന്നിലെ പ്രധാന കാരണം അശാസ്ത്രീയമായ സമയക്രമമാണെന്ന് ചൂണ്ടിക്കാട്ടിയ മന്ത്രി, ജീവനക്കാരെ മാത്രം പൂർണ്ണമായി പഴിചാരാൻ സാധിക്കില്ലെന്നും അഭിപ്രായപ്പെട്ടു. എറണാകുളം പോലുള്ള തിരക്കേറിയ നഗരങ്ങളിൽ രണ്ടര മിനിറ്റ് ഇടവേളയിൽ സർവീസ് നടത്താൻ ബസുകൾക്ക് സാധിക്കില്ലെന്ന് അദ്ദേഹം നിരീക്ഷിച്ചു.
ഈ സാഹചര്യത്തിൽ സ്വകാര്യ ബസുകളുടെ സമയക്രമത്തിൽ സമഗ്രമായ മാറ്റം വരുത്താൻ സർക്കാർ ഔദ്യോഗിക നടപടികൾ ആരംഭിച്ചതായും സമയപരിധി പുനഃപരിശോധിക്കുമെന്നും മന്ത്രി അറിയിച്ചു.
