കണ്ണൂർ: സർക്കാരിന്റെ നിയന്ത്രണം സഭകൾ ഉൾപ്പെടെയുള്ള ബാഹ്യശക്തികളുടെ കൈകളിലാണോ എന്ന് സിപിഐ സംസ്ഥാന സെക്രട്ടറി ബിനോയ് വിശ്വം. റവന്യൂ മന്ത്രിയുടെ പേഴ്സണൽ സ്റ്റാഫ് നിയമനവുമായി ബന്ധപ്പെട്ട് ഉയർന്ന വിവാദങ്ങളിൽ മുഖ്യമന്ത്രിയും റവന്യൂ മന്ത്രിയും നിലപാട് വ്യക്തമാക്കണമെന്നും അദ്ദേഹം പരസ്യമായി ആവശ്യപ്പെട്ടു.
റവന്യൂ മന്ത്രിയുടെ സ്റ്റാഫ് സെക്രട്ടറിമാരിൽ തലശ്ശേരി അതിരൂപത ശുപാർശ ചെയ്ത ആളെ ഉൾപ്പെടുത്തിയതിന് ആർച്ച് ബിഷപ്പ് മാർ ജോസഫ് പാംപ്ലാനി പരസ്യമായി നന്ദി പ്രകടിപ്പിച്ചതാണ് രാഷ്ട്രീയ വൃത്തങ്ങളിൽ വലിയ ചർച്ചകൾക്ക് തുടക്കമിട്ടത്.
സഭ നിർദ്ദേശിക്കുന്ന പ്രതിനിധിയെ നിയമിക്കാമെന്ന് മന്ത്രി മുൻപ് ഉറപ്പുനൽകിയിരുന്നുവെന്നും ആ വാക്ക് പാലിക്കപ്പെട്ടുവെന്നുമായിരുന്നു ആർച്ച് ബിഷപ്പിന്റെ പ്രസ്താവന. ഇതിനെതിരെയാണ് ഭരണനേതൃത്വത്തെ നേരിട്ട് പ്രതിക്കൂട്ടിലാക്കി സിപിഐ നേതൃത്വം കടുത്ത ചോദ്യങ്ങളുമായി രംഗത്തെത്തിയിരിക്കുന്നത്.
