തിരുവനന്തപുരം: തേവലക്കാട് എസ്എൻയുപി സ്കൂളിൽ ഉച്ചാരണശുദ്ധിയില്ലെന്ന പേരിൽ ദളിത് വിദ്യാർത്ഥിയുടെ നാക്ക് പരസ്യമായി വടിപ്പിച്ച സംഭവത്തിൽ നടപടി നേരിട്ട അധ്യാപകൻ പ്രധാനാധ്യാപികയ്‌ക്കെതിരെ പരാതിയുമായി രംഗത്ത്. സ്കൂളിൽ ഹാജർ പട്ടികയിൽ കൃത്രിമം കാട്ടാൻ ശ്രമം നടന്നുവെന്നും തുടർച്ചയായി ക്ലാസിൽ വരാത്ത കുട്ടികൾക്ക് പോലും പ്രധാനാധ്യാപിക ഹാജർ രേഖപ്പെടുത്തുന്നുണ്ടെന്നും സസ്പെൻഷനിലായ അധ്യാപകൻ ആകർഷ് ആരോപിച്ചു. വ്യക്തിവൈരാഗ്യം കാരണമാണ് തനിക്കെതിരെ സസ്പെൻഷൻ നടപടി എടുത്തതെന്നും അദ്ദേഹം വ്യക്തമാക്കി.
വിദ്യാർത്ഥിയുടെ നാക്ക് വടിപ്പിച്ച വിഷയത്തിൽ അധ്യാപകന്റെ ഭാഗത്ത് ഗുരുതരമായ ജാഗ്രതക്കുറവുണ്ടായെന്നും പ്രധാനാധ്യാപികയുടെ ഔദ്യോഗിക ജോലി തടസ്സപ്പെടുത്തിയെന്നും എഇഒയുടെ റിപ്പോർട്ടിൽ ചൂണ്ടിക്കാട്ടുന്നുണ്ട്. എന്നാൽ കുട്ടിയോട് കാട്ടിയ ക്രൂരത പുറത്തുപറഞ്ഞതിലുള്ള വിരോധം തീർക്കാനാണ് അധ്യാപകൻ ഇപ്പോൾ തനിക്കെതിരെ വ്യാജ ആരോപണം ഉന്നയിക്കുന്നതെന്ന് പ്രധാനാധ്യാപിക പ്രതികരിച്ചു.
സ്കൂളിലെ ആഭ്യന്തര തർക്കങ്ങൾ സ്ഥാപനത്തിന് ഭൂഷണമല്ലെന്ന വിലയിരുത്തലിലാണ് വിദ്യാഭ്യാസ വകുപ്പ്. ഉയർന്നുവന്ന പുതിയ ആരോപണങ്ങളിൽ വിദ്യാഭ്യാസ ഡെപ്യൂട്ടി ഡയറക്ടർ (ഡിഡിഇ) അന്വേഷണം നടത്തിയേക്കും. സംഭവത്തിൽ കല്ലമ്പലം പോലീസും അന്വേഷണം നടത്താൻ സാധ്യതയുണ്ട്.
