തിരുവനന്തപുരം: വിവാദമായ ജിഎൻഎ (GNA) പ്ലാറ്റ്‌ഫോമുമായുള്ള വൈദ്യുതി ഇടപാടിൽ സംസ്ഥാനത്തിന് 903 കോടി രൂപയുടെ ഭീമമായ നഷ്ടമുണ്ടാകുമെന്ന് സ്ഥിരീകരിക്കുന്ന കെഎസ്ഇബിയുടെ രണ്ടാമത്തെ ആഭ്യന്തര റിപ്പോർട്ട് പുറത്തുവന്നു. താരിഫ് ആൻഡ് കൊമേഴ്‌സ്യൽ വിഭാഗം എക്സിക്യൂട്ടീവ് എൻജിനീയർ തയ്യാറാക്കി ചീഫ് എൻജിനീയർ മുഖേന മുൻ സിഎംഡി എം.ജി. രാജമാണിക്യത്തിന് കൈമാറിയ റിപ്പോർട്ടിലാണ് ഗുരുതരമായ സാമ്പത്തിക-ചട്ട ലംഘനങ്ങൾ ചൂണ്ടിക്കാണിച്ചിരിക്കുന്നത്. ഇതിന്റെകൂടി അടിസ്ഥാനത്തിലാണ് പദ്ധതി ഉപേക്ഷിച്ച് ഹിമാചൽ പ്രദേശിൽനിന്ന് വൈദ്യുതി വാങ്ങണമെന്ന് കാണിച്ച് രാജമാണിക്യവും വകുപ്പ് മന്ത്രിയും നിലപാടെടുത്തത്.
വൈദ്യുതി വിൽക്കാനുള്ള കേന്ദ്ര ഇലക്ട്രിസിറ്റി റെഗുലേറ്ററി കമ്മീഷന്റെ ഔദ്യോഗിക അംഗീകാരം ജിഎൻഎയുടെ ഒടിപി പ്ലാറ്റ്‌ഫോമിന് ലഭിച്ചിട്ടില്ലെന്നതാണ് റിപ്പോർട്ടിലെ ഏറ്റവും നിർണായകമായ കണ്ടെത്തൽ. കഴിഞ്ഞ സർക്കാരിന്റെ ഭരണകാലത്ത് സമാനമായ ഊർജ്ജ പ്രതിസന്ധിയുണ്ടായപ്പോഴും ഈ പ്ലാറ്റ്‌ഫോമിൽനിന്ന് വൈദ്യുതി വാങ്ങുന്നതിനെ റെഗുലേറ്ററി അതോറിറ്റി കർശനമായി വിലക്കിയിരുന്നു. മാനദണ്ഡങ്ങൾ ഇല്ലാതിരുന്നിട്ടും സർക്കാർ ഈ കരാറുമായി വീണ്ടും മുന്നോട്ടുപോയതാണ് നിലവിൽ കടുത്ത വിമർശനത്തിന് വഴിവെച്ചിരിക്കുന്നത്.
അഞ്ച് മാസത്തേക്ക് ഹിമാചൽ പ്രദേശിൽ നിന്ന് ആവശ്യമുള്ള പീക്ക് സമയത്ത് മാത്രം വൈദ്യുതി വാങ്ങിയാൽ 1,105 കോടി രൂപയാകും ചിലവ് വരിക; എന്നാൽ 24 മണിക്കൂറും വാങ്ങേണ്ടി വരുന്ന ജിഎൻഎയ്ക്ക് 1,566 കോടി രൂപ ചെലവാകുമെന്നതിനാൽ ഹിമാചൽ വഴിയുള്ള ഇടപാടിൽ മാത്രം 461 കോടി ലാഭിക്കാമായിരുന്നു. ഇതിനുപുറമെ, ജിഎൻഎയിൽ നിന്ന് വാങ്ങിയാലും പീക്ക് ലോഡ് ആവശ്യങ്ങൾക്കായി വീണ്ടും 442.21 കോടിയുടെ വൈദ്യുതി അധികമായി പുറത്തുനിന്ന് കണ്ടെത്തേണ്ടിവരും. ഈ രണ്ട് അധിക ചിലവുകളും ചേർത്താണ് ജിഎൻഎ വഴിയുള്ള ഇടപാടിൽ ആകെ 903 കോടി രൂപയുടെ നഷ്ടം സംസ്ഥാനത്തിന് സംഭവിക്കുമെന്ന് റിപ്പോർട്ടിൽ കൃത്യമായി വ്യക്തമാക്കിയത്.
