തിരുവനന്തപുരം: സമീപകാലത്തെ ഏറ്റവും കുറഞ്ഞ നിരക്കിൽ വൈദ്യുതി ലഭ്യമാക്കുന്ന സിന്നാർ ദീർഘകാല വൈദ്യുതി കരാർ ഒപ്പുവെക്കുന്നത് വൈകുന്ന പശ്ചാത്തലത്തിൽ പദ്ധതി അടിയന്തരമായി നടപ്പാക്കാൻ മുഖ്യമന്ത്രി നിർദേശം നൽകി. യൂണിറ്റിന് 5.18 രൂപ നിരക്കിൽ 540 മെഗാവാട്ട് വൈദ്യുതി ലഭ്യമാക്കുന്ന കരാറിൽ എത്രയും വേഗം ഒപ്പിടണമെന്ന് റെഗുലേറ്ററി കമ്മീഷനും നേരത്തെ ഉത്തരവിട്ടിരുന്നു.
മുഖ്യമന്ത്രിയും വൈദ്യുതി മന്ത്രിയും ഡൽഹിയിലെത്തി എൻടിപിസി ചെയർമാനുമായി നടത്തിയ ചർച്ചകൾക്കൊടുവിലാണ് പദ്ധതിയിൽ ധാരണയായത്. നേരത്തെ 270 മെഗാവാട്ട് വൈദ്യുതി 5.18 രൂപ നിരക്കിൽ നൽകാമെന്ന് മുൻ കെഎസ്ഇബി ചെയർമാൻ രാജമാണിക്യത്തിന് ഉറപ്പ് ലഭിക്കുകയും ഇതുമായി ബന്ധപ്പെട്ട രേഖകൾ കെഎസ്ഇബിക്ക് കൈമാറുകയും ചെയ്തിരുന്നു. റെഗുലേറ്ററി കമ്മീഷന്റെ കർശന നിർദേശമുണ്ടായിട്ടും തുടർതീരുമാനങ്ങളെടുക്കാതെ കെഎസ്ഇബി മെല്ലെപ്പോക്ക് തുടരുകയായിരുന്നു.
കരാർ പ്രാബല്യത്തിൽ വരുന്നതോടെ 2027 ജനുവരി മുതൽ വൈദ്യുതി ലഭിച്ചുതുടങ്ങുകയും മാർച്ച് മാസത്തോടെ പൂർണ്ണതോതിലുള്ള 540 മെഗാവാട്ടും സംസ്ഥാനത്തിന് ലഭ്യമാകുകയും ചെയ്യും. ഇത് കേരളത്തിന്റെ ഊർജ്ജ പ്രതിസന്ധിക്ക് വലിയൊരളവിൽ പരിഹാരമാകുമെന്നതിനൊപ്പം കെഎസ്ഇബിക്കും ഉപഭോക്താക്കൾക്കും കാര്യമായ സാമ്പത്തിക നേട്ടമുണ്ടാക്കുകയും ചെയ്യും.
