കൊച്ചി: അരിയിൽ ഷുക്കൂർ വധക്കേസിൽ അന്തിമവിധി ഉടൻ ഉണ്ടാകില്ല. വിധി പ്രഖ്യാപിക്കുന്ന തീയതി അറിയിക്കുന്നത് കൊച്ചി സിബിഐ പ്രത്യേക കോടതി മൂന്ന് നവംബർ 16-ലേക്ക് മാറ്റി. നേരത്തെ നവംബർ 12-ന് വിധിത്തീയതി വ്യക്തമാക്കുമെന്നായിരുന്നു അറിയിച്ചിരുന്നത്.

സിപിഐഎം നേതാക്കളായ പി. ജയരാജൻ, ടി.വി. രാജേഷ് എന്നിവരുൾപ്പെടെ 33 പ്രതികളുള്ള കേസിൽ രണ്ട് പേർ മരിച്ചതിനെ തുടർന്ന് 31 പേരാണ് വിചാരണ നേരിട്ടത്. ജഡ്ജി പി. ശബരിനാഥ് മുമ്പാകെ 2025 മേയ് അഞ്ചിനാണ് വിചാരണ നടപടികൾ ആരംഭിച്ചത്. 17 മാസം നീണ്ടുനിന്ന പ്രക്രിയയിൽ 41 സാക്ഷികളെ കോടതി വിസ്തരിച്ചു.

2012 ഫെബ്രുവരി 20-ന് ചെറുകുന്ന് കീഴറയിൽ വെച്ചാണ് എംഎസ്എഫ് പ്രാദേശിക പ്രവർത്തകനായ ഷുക്കൂർ കൊല്ലപ്പെടുന്നത്. പട്ടുവം അരിയിൽ പ്രദേശത്ത് സിപിഐഎം-മുസ്‌ലിം ലീഗ് സംഘർഷത്തിൽ പരിക്കേറ്റയാളെ കാണാനെത്തിയ സിപിഐഎം നേതാക്കൾ സഞ്ചരിച്ച വാഹനം തളിപ്പറമ്പിന് സമീപം പട്ടുവത്തുവെച്ച് യൂത്ത് ലീഗ് പ്രവർത്തകർ ആക്രമിച്ചതിന് തൊട്ടുപിന്നാലെയായിരുന്നു കൊലപാതകം.

വാഹനത്തിന് നേരെ ആക്രമണം നടത്തിയതിൽ പങ്കാളിയായെന്നാരോപിച്ചാണ് ഷുക്കൂറിനെ വധിച്ചതെന്നാണ് കേസ്. ആക്രമണത്തിന് ശേഷം അന്നത്തെ സിപിഐഎം കണ്ണൂർ ജില്ലാ സെക്രട്ടറിയായിരുന്ന പി. ജയരാജനെയും ടി.വി. രാജേഷിനെയും പ്രവേശിപ്പിച്ച തളിപ്പറമ്പ് സഹകരണ ആശുപത്രി കേന്ദ്രീകരിച്ചാണ് പ്രാദേശിക നേതാക്കൾ കൊലപാതകം ആസൂത്രണം ചെയ്തതെന്നും, ഇതിനെക്കുറിച്ച് ഇരുനേതാക്കൾക്കും ബോധ്യമുണ്ടായിരുന്നുവെന്നും കുറ്റപത്രത്തിൽ വ്യക്തമാക്കുന്നു.