തിരുവനന്തപുരം: മണ്ഡല മകരവിളക്ക് തീർത്ഥാടനത്തിന് മുന്നോടിയായി സന്നിധാനത്ത് അരവണ നിർമ്മാണത്തിനാവശ്യമായ 10,000 ലിറ്റർ നെയ്യ് മിൽമയിൽ നിന്ന് വാങ്ങാൻ തിരുവിതാംകൂർ ദേവസ്വം ബോർഡ് തത്വത്തിൽ ധാരണയിലെത്തി. നവംബർ 15 വരെ ക്ഷേത്രനട അടച്ചിരിക്കുന്നതിനാൽ ഭക്തർ വഴിപാടായി നൽകുന്ന നെയ്യ് ലഭ്യമല്ലാത്ത സാഹചര്യത്തിലാണ് വൃശ്ചികം ഒന്നു വരെയുള്ള ആവശ്യങ്ങൾക്കായി അടിയന്തരമായി നെയ്യ് സംഭരിക്കുന്നത്. വിഷയത്തിൽ നിയമോപദേശം തേടുമെന്നും ദേവസ്വം വിജിലൻസ് വിഭാഗത്തിന്റെ ഔദ്യോഗിക അനുമതി ലഭിച്ച ശേഷമേ നെയ്യ് സന്നിധാനത്ത് എത്തിക്കൂ എന്നും അധികൃതർ വ്യക്തമാക്കി.
മുൻപ് വിതരണം ചെയ്ത നെയ്യിന്റെ ഗുണനിലവാരക്കുറവ് വലിയ വിവാദങ്ങൾക്ക് വഴിവെച്ചിരുന്നു. ഇതിന്റെ പശ്ചാത്തലത്തിൽ, സുരക്ഷ ഉറപ്പാക്കുന്നതിനായി കവചിത വാഹനങ്ങളിൽ മാത്രമേ നെയ്യ് കൊണ്ടുപോകാവൂ എന്ന് കർശന നിർദ്ദേശം നൽകിയിട്ടുണ്ട്.
മണ്ഡലകാലം തുടങ്ങുന്നതോടെ ആവശ്യത്തിന് കരുതൽ ശേഖരം ഉറപ്പുവരുത്താൻ സന്നിധാനത്ത് പരമാവധി ശേഷിയിൽ അരവണ നിർമ്മാണം പുരോഗമിക്കുകയാണ്. നിലവിലെ പർച്ചേസ് വൃശ്ചികം ഒന്നാം തീയതി വരെയുള്ള ദിവസങ്ങളിലെ ഉപയോഗത്തിന് മാത്രമായിരിക്കും.
