കൊച്ചി: സംസ്ഥാന സമ്മേളന റാലിയെ തുടർന്ന് നഗരത്തിൽ വലിയ രീതിയിൽ ഗതാഗതക്കുരുക്കുണ്ടാക്കിയ സംഭവത്തിൽ മുസ്ലിം യൂത്ത് ലീഗ് നേതാക്കൾക്കും പ്രവർത്തകർക്കുമെതിരെ പോലീസ് കേസെടുത്തു. യൂത്ത് ലീഗ് സംസ്ഥാന പ്രസിഡന്റ് സയ്യദ് മുനവ്വറലി ശിഹാബ് തങ്ങൾ, ജനറൽ സെക്രട്ടറി പി.കെ. ഫിറോസ് എന്നിവരുൾപ്പെടെ 12 നേതാക്കൾക്കെതിരെയും തിരിച്ചറിയാൻ സാധിക്കുന്ന രണ്ടായിരത്തോളം പേർക്കെതിരെയുമാണ് കേസെടുത്തത്.
യൂത്ത് ലീഗ് സംസ്ഥാന സമ്മേളനത്തിന്റെ ഭാഗമായി ഗോശ്രീ പാലം മുതൽ മറൈൻഡ്രൈവ് വരെയുള്ള പ്രധാന പാതയിലൂടെയായിരുന്നു പ്രകടനം സംഘടിപ്പിച്ചത്. റോഡ് പൂർണ്ണമായി കയ്യടക്കി നടത്തിയ മാർച്ച് നഗരത്തിൽ മണിക്കൂറുകളോളം നീണ്ട രൂക്ഷമായ വാഹനക്കുരുക്കിന് വഴിവെച്ചിരുന്നു.
നഗരജീവിതം സ്തംഭിപ്പിച്ച ഗതാഗത തടസ്സത്തിനെതിരെ സോഷ്യൽ മീഡിയയിലടക്കം വലിയ രീതിയിലുള്ള ജനരോഷവും വിമർശനങ്ങളും ഉയർന്നതിന് പിന്നാലെയാണ് പോലീസ് കേസ് രജിസ്റ്റർ ചെയ്തത്.
