തിരുവനന്തപുരം: ലഹരിവേട്ടയ്ക്കായി നടപ്പാക്കിയ 'തൂഫാൻ ദി നാർക്കോ ഹണ്ട്' പദ്ധതിക്ക് പിന്നാലെ സംസ്ഥാനത്തെ കുറ്റകൃത്യങ്ങളിൽ 35 ശതമാനം ഇടിവുണ്ടായതായി ക്രൈം റെക്കോർഡ്സ് കണക്കുകൾ ഉദ്ധരിച്ച് ആഭ്യന്തരമന്ത്രി രമേശ് ചെന്നിത്തല. കേന്ദ്ര സർക്കാരിന്റെ പൂർണ്ണ പിന്തുണയോടെ എല്ലാ വിഭാഗങ്ങളെയും ഏകോപിപ്പിച്ചാണ് ദൗത്യം മുന്നോട്ട് കൊണ്ടുപോകുന്നതെന്നും അദ്ദേഹം വ്യക്തമാക്കി.
പദ്ധതിയുടെ തുടർച്ചയായി ലഹരിക്ക് അടിമപ്പെട്ടവരെ സാധാരണ ജീവിതത്തിലേക്ക് മടക്കിക്കൊണ്ടുവരാൻ ലക്ഷ്യമിട്ടുള്ള 'ഓപ്പറേഷൻ കെയർ' ഈ മാസം 16-ന് ആരംഭിക്കും. ഇതിനായി 35 ആശുപത്രികളിൽ പ്രത്യേക ചികിത്സാ സൗകര്യങ്ങൾ സജ്ജമാക്കിയിട്ടുണ്ട്. നോഡൽ ഓഫീസർ പുട്ട വിമലാദിത്യയുടെ നേതൃത്വത്തിൽ പോലീസിലെ പ്രത്യേക നിരീക്ഷണ സംവിധാനം വഴിയാണ് പ്രവർത്തനങ്ങളും കണക്കുകളും പുറത്തുവിടുന്നതെന്നും ജനകീയ മുന്നേറ്റമായി മാറുന്ന ദൗത്യത്തിന് മാതാപിതാക്കളിൽ നിന്നാണ് വലിയ പിന്തുണ ലഭിക്കുന്നതെന്നും മന്ത്രി പറഞ്ഞു.
റോഡപകടങ്ങൾ തടയാൻ കർശന നടപടികൾ സ്വീകരിക്കുമെന്നും രാത്രികാലങ്ങളിൽ സംസ്ഥാനവ്യാപകമായി പോലീസ് പരിശോധന കർശനമാക്കുമെന്നും അദ്ദേഹം അറിയിച്ചു. ഒറ്റദിവസത്തെ പരിശോധനയിൽ മദ്യപിച്ച് വാഹനമോടിച്ച 57 സ്കൂൾ ബസ് ഡ്രൈവർമാരെയാണ് പിടികൂടിയത്. സ്വകാര്യ ബസുകളുടെ അമിതവേഗവും മദ്യപിച്ചുള്ള ഡ്രൈവിംഗും അനുവദിക്കില്ലെന്നും ട്രാഫിക് ബോധവൽക്കരണം ശക്തമാക്കുമെന്നും ആഭ്യന്തരമന്ത്രി കൂട്ടിച്ചേർത്തു.
