തിരുവനന്തപുരം: സെക്രട്ടേറിയറ്റിന് മുന്നിൽ എൽപി സ്കൂൾ ടീച്ചർ (LPST) റാങ്ക് ഹോൾഡർമാർ നടത്തുന്ന സമരം 127 ദിവസവും, സമരസമിതി നേതാവ് വളർമതിയുടെ അനിശ്ചിതകാല നിരാഹാര സമരം 15-ാം ദിവസവും പിന്നിട്ടു. ആരോഗ്യനില അതീവ വഷളായിട്ടും ആവശ്യങ്ങൾ അംഗീകരിക്കാതെ സമരത്തിൽ നിന്ന് പിന്നോട്ടില്ലെന്ന് ഉദ്യോഗാർത്ഥികൾ വ്യക്തമാക്കി.
ഡ്രിപ്പ് പോലും കയറ്റാൻ സാധിക്കാത്തവിധം ശാരീരികനില മോശമായിട്ടുണ്ടെന്നും, തന്നെ ബലം പ്രയോഗിച്ച് ആശുപത്രിയിലേക്ക് കൊണ്ടുപോകാനാണ് നീക്കമെങ്കിൽ ശക്തമായി പ്രതിരോധിക്കുമെന്നും വളർമതി വ്യക്തമാക്കി. തന്റെ ജീവനിൽ സർക്കാരിന് ആശങ്കയുണ്ടെങ്കിൽ ചെയ്യേണ്ടത് വിഷയത്തിൽ അടിയന്തരമായി ഇടപെടുക മാത്രമാണെന്ന് അവർ പറഞ്ഞു.
വലിയ പ്രതീക്ഷയോടെ അധികാരത്തിലേറ്റിയ സർക്കാരിൽ നിന്ന് ഉദ്യോഗാർത്ഥികൾക്ക് ഇതുവരെ നീതി ലഭിച്ചിട്ടില്ലെന്ന് വളർമതി കുറ്റപ്പെടുത്തി. പ്രശ്നത്തിന് പരിഹാരം കാണാതെ ആശുപത്രിയിലേക്ക് മാറ്റാനുള്ള നീക്കങ്ങൾ ചെറുക്കുമെന്ന നിലപാടിലാണ് സമരസമിതി.
