തിരുവനന്തപുരം: പുന്നപ്ര-വയലാർ സമരവുമായി ബന്ധപ്പെട്ട ചരിത്രരേഖാ വിവാദത്തിൽ കേന്ദ്ര കമ്മിറ്റി അംഗം തോമസ് ഐസക്കിന് പൂർണ്ണ പ്രതിരോധം തീർത്ത് സിപിഐഎം. രേഖ തയ്യാറാക്കാനുള്ള ചുമതല ഐസക്കിന് നൽകിയത് സിപിഐഎം ആണെന്നും, അദ്ദേഹത്തെ ആരാണ് ചുമതലപ്പെടുത്തിയതെന്ന് ചോദിക്കാൻ സിപിഐക്ക് എന്ത് അധികാരമാണുള്ളതെന്നും സിപിഐഎം ജില്ലാ സെക്രട്ടറി ആർ. നാസർ ചോദിച്ചു. ഇത്തരം ചോദ്യങ്ങൾ ഉന്നയിക്കുന്നത് അൽപ്പത്തരമാണെന്നും അദ്ദേഹം വിമർശിച്ചു.
സിപിഐഎം വാരികയായ ചിന്തയുടെ പുന്നപ്ര-വയലാർ വാർഷിക പതിപ്പിൽ സമരനായകരുടെ ചിത്രങ്ങൾ നൽകിയ മുൻഗണനാക്രമത്തെച്ചൊല്ലിയാണ് പത്രാധിപരായ തോമസ് ഐസക്കിനെതിരെ വിമർശനങ്ങൾ ഉയർന്നത്. പ്രമുഖ സമരനായകരായ ടി.വി. തോമസ്, സി.കെ. കുമാരപ്പണിക്കർ എന്നിവരുടെ പ്രാധാന്യം കുറച്ചുകാണിച്ചെന്നായിരുന്നു പ്രധാന ആക്ഷേപം.
സമരത്തിന് നേതൃത്വം നൽകിയ എല്ലാ നേതാക്കൾക്കും തുല്യ പ്രാധാന്യമാണുള്ളതെന്നും അക്ഷരമാലാ ക്രമത്തിൽ പേരുകൾ ചിട്ടപ്പെടുത്തിയപ്പോൾ ചിലർ താഴെപ്പോയത് ടി.വി. തോമസിനെ അവഗണിക്കാനോ മോശപ്പെടുത്താനോ അല്ലെന്നും ആർ. നാസർ വിശദീകരിച്ചു. സമഗ്രമായ പഠനം നടത്തി ഐസക്ക് തയ്യാറാക്കിയ ചരിത്രരേഖ പൂർണ്ണമായും കൃത്യമാണെന്നും, അനാവശ്യ വിവാദങ്ങൾ ഉണ്ടാക്കുന്നതിന് പകരം സമഗ്ര രേഖ തയ്യാറാക്കിയ അദ്ദേഹത്തിന്റെ ധീരതയെ അഭിനന്ദിക്കുകയാണ് വേണ്ടതെന്നും അദ്ദേഹം വ്യക്തമാക്കി.
