തിരുവനന്തപുരം: പാളയത്തിന് സമീപം പ്രവർത്തിക്കുന്ന 'പൊറോട്ട ഹട്ട്' എന്ന ഭക്ഷണശാലയിലെ ഇതരസംസ്ഥാന തൊഴിലാളികൾക്ക് നേരെ ഉടമയുടെ ഭാഗത്തുനിന്നുണ്ടായ ക്രൂരമർദ്ദനത്തിൽ തൊഴിൽ വകുപ്പ് മന്ത്രി ബിന്ദു കൃഷ്ണ ഇടപെട്ടു. തൊഴിലാളികൾ താമസിക്കുന്ന കേന്ദ്രങ്ങളിൽ കർശന പരിശോധന നടത്താൻ ജില്ലാ ലേബർ ഓഫീസർക്ക് മന്ത്രി നിർദ്ദേശം നൽകി. സംഭവം ശ്രദ്ധയിൽപ്പെട്ടിട്ടുണ്ടെന്നും നഗരസഭയും തൊഴിൽ വകുപ്പും ചേർന്ന് സംയുക്തമായി പരിശോധന നടത്തേണ്ടത് അത്യന്താപേക്ഷിതമാണെന്നും തിരുവനന്തപുരം മേയർ വി.വി. രാജേഷ് പ്രതികരിച്ചു.
പാളയം കുന്നുകുഴിയിലെ താമസസ്ഥലത്ത് വെച്ചാണ് ജാർഖണ്ഡ്, നേപ്പാൾ സ്വദേശികളായ തൊഴിലാളികൾക്ക് നേരെ ഹോട്ടലുടമയുടെ ആക്രമണമുണ്ടായത്. വിശ്രമസമയത്ത് ജോലി ചെയ്യാൻ വിസമ്മതിച്ചതിനെ തുടർന്നായിരുന്നു ക്രൂരമായ മർദ്ദനം. അക്രമത്തിൽ ഗുരുതരമായി പരിക്കേറ്റ പതിനേഴുകാരൻ ഉൾപ്പെടെയുള്ളവരെ ജനറൽ ആശുപത്രിയിൽ പ്രവേശിപ്പിച്ചു.
തൊഴിലാളികളുടെ മൊബൈൽ ഫോണുകൾ തല്ലിത്തകർക്കുകയും പോലീസെത്തുന്നതിന് മുൻപ് ഇവരെ ആശുപത്രിയിൽ നിന്ന് മറ്റൊരു സ്ഥലത്തേക്ക് മാറ്റാൻ ശ്രമിക്കുകയും ചെയ്തതായി പരാതിയുണ്ട്. സംഭവത്തിൽ പോലീസ് അന്വേഷണവും നിയമനടപടികളും പുരോഗമിക്കുകയാണ്.
പല സ്ഥാപനങ്ങളിലും ബാലവേല നടക്കുന്നതായും കൃത്യമായ രേഖകളില്ലാതെ തൊഴിലാളികൾ ജോലി ചെയ്യുന്നതായും മേയർ ചൂണ്ടിക്കാട്ടി. നഗരസഭ പരിശോധനയ്ക്കെത്തുമ്പോൾ ഇത്തരക്കാർ ഒളിവിൽ പോകുന്ന സാഹചര്യമാണുള്ളതെന്നും തൊഴിൽ വകുപ്പിന്റെ ശക്തമായ മേൽനോട്ടമാണ് ഇത്തരം ഇടങ്ങളിൽ ആവശ്യമെന്നും മേയർ വ്യക്തമാക്കി.
