കണ്ണൂർ: കരിപ്പൂർ വിമാനത്താവളത്തിലെ സ്വർണം പൊട്ടിക്കൽ സംഭവത്തിൽ നിർണ്ണായക വഴിത്തിരിവ്. ഭർത്താവിനെയും കുട്ടികളെയും മുൻനിർത്തി സ്വർണ്ണക്കടത്തും കവർച്ചയും മുൻകൂട്ടി ആസൂത്രണം ചെയ്തത് അറസ്റ്റിലായ തലശ്ശേരി സ്വദേശിനി പ്രിയങ്ക (34) തന്നെയെന്ന് പോലീസ് സ്ഥിരീകരിച്ചു. സംഭവത്തിൽ യുവതിയുടെ ഭർത്താവിന് പങ്കില്ലെന്ന് വ്യക്തമായതോടെ ഇയാളെ കേസിൽ ഉൾപ്പെടുത്താതെ വിട്ടയച്ചു.
ദുബായിൽ നിന്നാണ് ഈ കവർച്ചയുടെ ഗൂഢാലോചന നടന്നത്. സഫ്വാൻ എന്നയാളാണ് ദുബായിൽ വെച്ച് സ്വർണം നൽകിയതെന്ന് പ്രിയങ്ക പോലീസിനോട് വെളിപ്പെടുത്തിയിട്ടുണ്ട്. സ്വർണം കടത്തിക്കൊണ്ടുവന്ന ശേഷം കൈമാറേണ്ട യഥാർത്ഥ വ്യക്തിക്ക് നൽകാതെ കുടുംബത്തോടൊപ്പം കടന്നുകളഞ്ഞ്, അറസ്റ്റിലായ മറ്റ് പ്രതികളുമായി ചേർന്ന് സ്വർണം തട്ടിയെടുക്കാനായിരുന്നു യുവതിയുടെ നീക്കം.
ബുധനാഴ്ച രാവിലെ 11.30-ഓടെ വിമാനത്താവളത്തിന് പുറത്തുവെച്ച് സ്വർണം ലഭിക്കേണ്ടയാൾ പോലീസിൽ വിവരം അറിയിച്ചതിനെ തുടർന്ന് നാടകീയ സംഭവങ്ങളാണ് അരങ്ങേറിയത്. കാറിലും ബൈക്കുകളിലുമായി പിന്തുടർന്ന പോലീസ് പട്രോളിംഗ് സംഘം പുളിക്കൽ ആന്തിയൂർകുന്ന് റോഡിൽ വെച്ച് പ്രതികളെ സാഹസികമായി കീഴ്പ്പെടുത്തുകയായിരുന്നു.
കേസിൽ അറസ്റ്റിലായ കണ്ണൂർ സ്വദേശികളായ ശ്രീലാൽ, പ്രിൻസ്, സുബിത്ത് എന്നിവർ ഒട്ടേറെ കേസുകളിൽ പ്രതികളാണ്. സ്വർണം തട്ടിയെടുക്കുന്ന സംഘത്തിലെ പ്രധാനിയായ ശ്രീലാലിനെതിരെ നെടുമ്പാശ്ശേരിയിലും കവർച്ചാ കേസുണ്ട്.
