തിരുവനന്തപുരം: സൗജന്യ ചാർട്ടേഡ് വിമാനയാത്രയുമായി ബന്ധപ്പെട്ട അഴിമതി ആരോപണത്തിൽ മുഖ്യമന്ത്രിക്കും ചീഫ് സെക്രട്ടറിക്കും ലോകായുക്തയുടെ നോട്ടീസ്. കെ.എം. ഷാജഹാൻ സമർപ്പിച്ച ഹർജിയിൽ പ്രാഥമിക അന്വേഷണത്തിന്റെ ഭാഗമായാണ് നടപടി. കേസിൽ സർക്കാരിനെ കക്ഷി ചേർക്കണമെന്നും ഹർജിക്കാരൻ ആവശ്യപ്പെട്ടിട്ടുണ്ട്.

ജസ്റ്റിസ് എൻ. അനിൽകുമാർ ഉൾപ്പെട്ട ലോകായുക്ത ബെഞ്ചാണ് കേസ് പരിഗണിക്കുന്നത്. തുടർനടപടികൾക്കായി ഹർജി 2027 ജനുവരി 12-ലേക്ക് മാറ്റി.

മലപ്പുറം യാത്രയ്ക്കായി മുഖ്യമന്ത്രി വി.ഡി. സതീശൻ ചാർട്ടേഡ് വിമാനം ഉപയോഗിച്ചതാണ് വിവാദങ്ങൾക്ക് വഴിവെച്ചത്. യാത്ര സ്പോൺസർ ചെയ്തതാണെന്ന് മുഖ്യമന്ത്രിയുടെ ഓഫീസ് വിശദീകരിച്ചിരുന്നെങ്കിലും സ്പോൺസർ ആരാണെന്ന് വ്യക്തമാക്കാൻ മുഖ്യമന്ത്രി തയ്യാറായിരുന്നില്ല. തുടർന്ന് വിമാനയാത്രയുടെ തുക അടച്ചത് ചിപ്‌സൺ ഏവിയേഷൻസ് ആണെന്ന വിവരവും ഇൻവോയ്സും റിപ്പോർട്ടർ ടിവി പുറത്തുവിട്ടിരുന്നു. ചിപ്‌സൺ ഏവിയേഷൻസിന് മറ്റാരെങ്കിലും തുക നൽകിയിട്ടുണ്ടോ എന്നതടക്കമുള്ള വിഷയങ്ങളിൽ മുഖ്യമന്ത്രി പ്രതികരിച്ചിരുന്നില്ല.