കൊച്ചി: സമുദ്രോപരിതലത്തിലെ അസാധാരണ ചൂട്, ഉഷ്ണതരംഗങ്ങൾ, പവിഴപ്പുറ്റുകളുടെ തകർച്ച, ഉപദ്രവകാരികളായ ആൽഗകളുടെ പെരുകൽ (ആൽഗൽ ബ്ലൂം) എന്നിവ കടലിന്റെ ആവാസവ്യവസ്ഥയ്ക്കും മത്സ്യത്തൊഴിലാളികൾക്കും കനത്ത വെല്ലുവിളി സൃഷ്ടിക്കുന്നതായി ശാസ്ത്രജ്ഞർ. കൊച്ചി കേന്ദ്ര സമുദ്രമത്സ്യ ഗവേഷണ സ്ഥാപനത്തിൽ (സിഎംഎഫ്ആർഐ) സംഘടിപ്പിച്ച അന്താരാഷ്ട്ര ട്രെവർ സഫാരി സിമ്പോസിയത്തിലാണ് വിദഗ്ദ്ധർ ഈ ആശങ്ക പങ്കുവെച്ചത്.
കടലിലെ ഭൗതിക-ജൈവ മാറ്റങ്ങൾ മുൻകൂട്ടി തിരിച്ചറിഞ്ഞ് സമയബന്ധിതമായി നിർദ്ദേശങ്ങളും മുന്നറിയിപ്പുകളും നൽകാൻ കൂടുതൽ കാര്യക്ഷമമായ നിരീക്ഷണ സംവിധാനം അനിവാര്യമാണെന്ന് ശാസ്ത്രജ്ഞർ ചൂണ്ടിക്കാട്ടി. കൃത്രിമോപഗ്രഹ റിമോട്ട് സെൻസിംഗ്, അത്യാധുനിക സമുദ്ര നിരീക്ഷണ ഉപാധികൾ, കാലാവസ്ഥാ പ്രവചന മാതൃകകൾ, നിർമ്മിതബുദ്ധി എന്നിവ സംയോജിപ്പിച്ചുള്ള പ്രവർത്തനങ്ങൾ ഇതിനായി നടപ്പിലാക്കണമെന്നും സമ്മേളനം നിർദ്ദേശിച്ചു.
സമുദ്ര നിരീക്ഷണം, ഫിഷറീസ്, റിമോട്ട് സെൻസിംഗ്, കാലാവസ്ഥാ പഠനം തുടങ്ങിയ മേഖലകളിൽ നിന്നായി 30 രാജ്യങ്ങളെ പ്രതിനിധീകരിച്ച് മുന്നൂറിലധികം അന്താരാഷ്ട്ര പ്രതിനിധികളാണ് സിഎംഎഫ്ആർഐയിലെ സിമ്പോസിയത്തിൽ പങ്കെടുക്കുന്നത്.
