തിരുവനന്തപുരം: ഉന്നത വിദ്യാഭ്യാസ സ്ഥാപനങ്ങളിൽ റാഗിങ് പൂർണ്ണമായി ഇല്ലാതാക്കുന്നതിനായി രൂപകൽപ്പന ചെയ്ത 'സിദ്ധാർത്ഥ്' മൊബൈൽ ആപ്ലിക്കേഷന്റെ ഉദ്ഘാടനം മുഖ്യമന്ത്രി വി.ഡി. സതീശൻ നിർവ്വഹിച്ചു. പൂക്കോട് വെറ്ററിനറി കോളേജിൽ ക്രൂരമായ റാഗിങ്ങിനിരയായി ജീവൻ നഷ്ടപ്പെട്ട സിദ്ധാർത്ഥന്റെ സ്മരണാർത്ഥമാണ് വിദ്യാർത്ഥികൾക്ക് ഭയമില്ലാതെ പരാതി നൽകാൻ സഹായിക്കുന്ന ഈ ഡിജിറ്റൽ സംവിധാനം സർക്കാർ ഏർപ്പെടുത്തിയത്.
ക്യാമ്പസുകളിൽ റാഗിങ് ഉണ്ടായാൽ അതിശക്തമായ നിയമനടപടികൾ സ്വീകരിക്കുമെന്ന് വ്യക്തമാക്കിയ മുഖ്യമന്ത്രി, സിദ്ധാർത്ഥന്റെ അമ്മയുടെ കണ്ണീരിൽ നിന്നാണ് ഈ ആപ്പ് പിറവിയെടുത്തതെന്നും വിദ്യാർത്ഥികൾക്കൊപ്പം എപ്പോഴും സർക്കാരുണ്ടാകുമെന്നും പറഞ്ഞു. കൂടാതെ, കുട്ടികൾ ഉപരിപഠനത്തിനായി വിദേശത്തേക്ക് പോകുന്ന സാഹചര്യം ഒഴിവാക്കാൻ സംസ്ഥാനത്ത് തന്നെ മികച്ച അക്കാദമിക് പ്രോഗ്രാമുകളും പ്ലേസ്‌മെന്റുകളും ഉറപ്പാക്കുമെന്നും അദ്ദേഹം വ്യക്തമാക്കി.
സർക്കാർ അധികാരമേറ്റപ്പോൾ ജനങ്ങൾക്ക് നൽകിയ സുപ്രധാന വാഗ്ദാനങ്ങളിലൊന്നായ പുതിയ ആന്റി റാഗിങ് ആക്ട് നിയമസഭയിൽ അവതരിപ്പിക്കാനുള്ള നടപടികൾ പുരോഗമിക്കുകയാണെന്ന് ചടങ്ങിൽ സംസാരിച്ച ഉന്നത വിദ്യാഭ്യാസ മന്ത്രി റോജി എം. ജോൺ അറിയിച്ചു. ഇനി ഒരു കലാലയത്തിലും മറ്റൊരു സിദ്ധാർത്ഥൻ ഉണ്ടാകരുതെന്ന ശക്തമായ നിലപാടിന്റെ അടിസ്ഥാനത്തിലാണ് സർക്കാർ തലത്തിൽ ഈ മുൻകൈയെടുക്കൽ.
