അടൂർ: വിമർശിക്കുന്നവരെ വ്യക്തിഹത്യ നടത്താനും പോലീസിനെക്കൊണ്ട് കേസെടുപ്പിച്ച് വായടപ്പിക്കാനുമാണ് നീക്കമെങ്കിൽ അതിനെ നിയമപരമായി നേരിടുമെന്ന് കോൺഗ്രസ് നേതാവ് ശ്രീനാദേവി കുഞ്ഞമ്മയ്ക്ക് ഡിവൈഎഫ്ഐ അടൂർ ബ്ലോക്ക് കമ്മിറ്റിയുടെ മുന്നറിയിപ്പ്. 'ഡിവൈഎഫ്ഐ അടൂർ ബിസി' എന്ന ഫേസ്ബുക്ക് പേജിനെതിരെ ശ്രീനാദേവി പോലീസിൽ പരാതി നൽകിയ സംഭവത്തിലാണ് സംഘടന ഫേസ്ബുക്ക് കുറിപ്പിലൂടെ പ്രതികരിച്ചത്.
ശ്രീനാദേവി കുഞ്ഞമ്മ ക്രിമിനലാണെന്നും വാഹനം ഇടിച്ച് അപായപ്പെടുത്താൻ നോക്കിയെന്നും നാട്ടുകാർ ആരോപിക്കുന്ന വർഷങ്ങൾക്ക് മുൻപുള്ള വീഡിയോ സമൂഹമാധ്യമങ്ങളിൽ പ്രചരിപ്പിച്ചതിനെതിരെയാണ് അവർ പരാതി നൽകിയിരുന്നത്. എന്നാൽ ഈ വീഡിയോ ഡിവൈഎഫ്ഐ നിർമ്മിച്ചതല്ലെന്നും വർഷങ്ങളായി സമൂഹമാധ്യമങ്ങളിൽ നിലനിൽക്കുന്നതാണെന്നും കുറിപ്പിൽ വ്യക്തമാക്കുന്നു.
പഴയ വീഡിയോ പങ്കുവെച്ചതാണോ കുറ്റമെന്ന് ചോദിച്ച ഡിവൈഎഫ്ഐ, ഒരു കോൺഗ്രസ് മെമ്പർ ഉൾപ്പെടെയുള്ള പ്രദേശവാസികൾ ഇപ്പോഴും ശ്രീനാദേവിക്കെതിരെ പ്രതികരിക്കാൻ തയ്യാറാണെന്ന് ചൂണ്ടിക്കാട്ടി. വസ്തുതകൾ ഇതായിരിക്കെ, വീഡിയോ തെറ്റാണെന്ന് സ്ഥാപിക്കാൻ ശ്രമിക്കുന്ന കോൺഗ്രസ് പ്രവർത്തകരുടെ അവസ്ഥ ദയനീയമാണെന്നും സംഘടന പരിഹസിച്ചു.
