തിരുവനന്തപുരം: വർക്കലയിൽ വറ്റ മത്സ്യം കഴിച്ചതിനെ തുടർന്ന് ഭക്ഷ്യവിഷബാധയേറ്റ് ഗുരുതരാവസ്ഥയിലായിരുന്ന വർക്കല സ്വദേശി സുധീർ (40) തിരുവനന്തപുരം മെഡിക്കൽ കോളേജ് ആശുപത്രിയിൽ വെന്റിലേറ്ററിൽ ചികിത്സയിലിരിക്കെ മരിച്ചു. കഴിഞ്ഞ മാസം 30-നാണ് ആരോഗ്യനില മോശമായതിനെ തുടർന്ന് ഇദ്ദേഹത്തെ ആശുപത്രിയിൽ പ്രവേശിപ്പിച്ചത്. സമാനമായ രീതിയിൽ വറ്റ മത്സ്യം കഴിച്ച് അസ്വാസ്ഥ്യം അനുഭവപ്പെട്ട 27 പേർ വിവിധ ആശുപത്രികളിൽ ചികിത്സ തേടിയിട്ടുണ്ട്. ഇതിൽ നില ഗുരുതരമായ ചിലക്കൂർ സ്വദേശിയായ ഹാഷിം (17) പാരിപ്പള്ളി മെഡിക്കൽ കോളേജിൽ ചികിത്സയിലാണ്.
വെട്ടൂരിൽ നിന്ന് വിറ്റഴിച്ച മത്സ്യം കഴിച്ചവർക്കാണ് ദേഹാസ്വാസ്ഥ്യം ഉണ്ടായത്. കഴിഞ്ഞ രണ്ടു ദിവസങ്ങളിലായി തീരദേശത്ത് വറ്റ മത്സ്യത്തിന്റെ വൻ ചാകരയുണ്ടായതിനെ തുടർന്നാണ് വിപണിയിൽ ഇവ വ്യാപകമായി വിറ്റത്. സംഭവം പുറത്തറിഞ്ഞതോടെ വെട്ടൂർ ഭാഗത്ത് വറ്റ മത്സ്യത്തിന്റെ വിൽപ്പന പൂർണ്ണമായി നിർത്തിവെപ്പിച്ചു.
കൂട്ടത്തോടെ ആളുകൾക്ക് ശാരീരിക അസ്വസ്ഥതകൾ റിപ്പോർട്ട് ചെയ്ത പശ്ചാത്തലത്തിൽ മത്സ്യത്തിന്റെ സാമ്പിളുകൾ വിശദമായ ലാബ് പരിശോധനയ്ക്കായി അയച്ചതായി ജില്ലാ മെഡിക്കൽ ഓഫീസർ അറിയിച്ചു. പൊതുജനങ്ങൾ മത്സ്യം വാങ്ങുമ്പോൾ അതീവ ജാഗ്രത പാലിക്കണമെന്നും, ഭക്ഷ്യയോഗ്യമാണെന്ന് ഉറപ്പുവരുത്തിയ മത്സ്യങ്ങൾ മാത്രമേ ഉപയോഗിക്കാവൂ എന്നും നഗരസഭ കർശന നിർദേശം നൽകിയിട്ടുണ്ട്.
