തിരുവനന്തപുരം: സ്വകാര്യ കമ്പനികളിൽ നിന്ന് വൈദ്യുതി വാങ്ങുന്നത് സാമ്പത്തിക നഷ്ടത്തിന് ഇടയാക്കുമെന്നും, സ്വകാര്യ സ്രോതസ്സുകളിൽ നിന്ന് വൈദ്യുതി എത്തിയാലും സംസ്ഥാനത്ത് വൈദ്യുതിക്ഷാമം തുടരാൻ സാധ്യതയുണ്ടെന്നും കെഎസ്ഇബി വിലയിരുത്തി. രാത്രി സമയങ്ങളിലും തടസ്സമില്ലാതെ പ്രയോജനപ്പെടുത്താമെന്നതിനാൽ ഹിമാചൽ പ്രദേശിൽ നിന്നുള്ള വൈദ്യുതി വാങ്ങലാണ് കൂടുതൽ ഗുണകരമെന്ന് കെഎസ്ഇബി വ്യക്തമാക്കി.
ജിഎൻഎ (GNA) വഴി വെറും 500 മെഗാവാട്ട് വൈദ്യുതി മാത്രമാണ് ലഭ്യമാവുകയെന്നിരിക്കെ, ഹിമാചലിൽ നിന്ന് 800 മുതൽ 1200 മെഗാവാട്ട് വരെ വൈദ്യുതി വാങ്ങാൻ സാധിക്കുമെന്നും ബോർഡ് ചൂണ്ടിക്കാട്ടി.
എന്നാൽ ഹിമാചൽ സർക്കാരുമായി മുന്നോട്ടുപോയാൽ ഉണ്ടാകുമായിരുന്ന 2,232 കോടി രൂപയുടെ അധിക സാമ്പത്തിക ബാധ്യത ഒഴിവാക്കാനാണ് ജിഎൻഎ എന്ന സ്വകാര്യ സ്ഥാപനത്തിൽ നിന്ന് വൈദ്യുതി വാങ്ങാൻ തീരുമാനിച്ചതെന്ന് മുഖ്യമന്ത്രി വി.ഡി. സതീശൻ നേരത്തെ വ്യക്തമാക്കിയിരുന്നു. പിണറായി വിജയൻ മുഖ്യമന്ത്രിയായിരുന്ന കാലത്തും ഇതേ സ്വകാര്യ കമ്പനിയിൽ നിന്ന് വൈദ്യുതി വാങ്ങിയിട്ടുണ്ടെന്നും മന്ത്രിസഭാ യോഗത്തിന് ശേഷമുള്ള വാർത്താ സമ്മേളനത്തിൽ മുഖ്യമന്ത്രി ചൂണ്ടിക്കാട്ടിയിരുന്നു.
