കോട്ടയം: ചങ്ങനാശ്ശേരിയിൽ മദ്യലഹരിയിൽ ഇന്നോവ കാറോടിച്ച് നിരവധി വാഹനങ്ങളെ ഇടിച്ചുതെറിപ്പിച്ച പത്തനംതിട്ട തിരുവല്ല സ്വദേശിയായ പതിനെട്ടുകാരൻ ഗോകുൽ ബിനുവിനെ പോലീസ് പിടികൂടി അറസ്റ്റ് ചെയ്തു. കാറിടിച്ച് സ്കൂട്ടർ യാത്രികയായ സ്ത്രീക്ക് ഗുരുതരമായി പരിക്കേറ്റു. വൈദ്യപരിശോധനയിൽ യുവാവ് മദ്യപിച്ചിരുന്നതായി പോലീസ് ഔദ്യോഗികമായി സ്ഥിരീകരിച്ചു.
പായിപ്പാട് മുതൽ തെങ്ങണ വരെയുള്ള എട്ട് കിലോമീറ്ററോളം ദൂരം അമിതവേഗതയിലാണ് കാർ സഞ്ചരിച്ചത്. ഈ യാത്രയ്ക്കിടെയാണ് റോഡിലെ വാഹനങ്ങളെ ഇടിച്ചുതെറിപ്പിക്കുകയും സ്കൂട്ടർ യാത്രികയെ ഇടിച്ച് വീഴ്ത്തുകയും ചെയ്തത്. കൂട്ടിയിടിയുടെ ആഘാതത്തിൽ കാറിന്റെ ഒരു ടയർ പൂർണ്ണമായി ഊരിപ്പോയിട്ടും മൂന്ന് ചക്രങ്ങളുമായി വാഹനം മുന്നോട്ട് ഓടിച്ചുപോവുകയായിരുന്നു.
അപകടകരമായ പാച്ചിൽ കണ്ട നാട്ടുകാർ കാറിനെ പിന്തുടർന്ന് അതിസാഹസികമായി തടഞ്ഞുനിർത്തുകയായിരുന്നു. തുടർന്ന് നാട്ടുകാർ തടഞ്ഞുവെച്ച യുവാവിനെ പോലീസിന് കൈമാറി.
