തിരുവനന്തപുരം: ശ്രീകാര്യം പാങ്ങപ്പാറയിൽ 17-കാരനായ അഭിറാം കൊല്ലപ്പെട്ട സംഭവത്തിൽ പ്രതികൾ ലക്ഷ്യമിട്ടിരുന്നത് ഇരട്ടക്കൊലപാതകമെന്ന് പോലീസ് കണ്ടെത്തൽ. കേസിൽ കൂടുതൽ വ്യക്തികൾ ഉൾപ്പെട്ടിട്ടുണ്ടോയെന്ന് അന്വേഷിച്ചുവരികയാണെന്നും കൊല്ലപ്പെട്ട അഭിറാമിന്റെ കാണാതായ മൊബൈൽ ഫോൺ കണ്ടെത്താനുള്ള തിരച്ചിൽ ഊർജ്ജിതമാക്കിയെന്നും അന്വേഷണസംഘം അറിയിച്ചു. അഭിറാമിന്റെ ഇൻസ്റ്റഗ്രാം സന്ദേശങ്ങൾ നീക്കം ചെയ്യപ്പെട്ടത് എങ്ങനെയെന്ന് പരിശോധിക്കുന്ന സൈബർ സെൽ, ഈ അക്കൗണ്ട് മറ്റൊരു പെൺസുഹൃത്തുമായി പങ്കുവെച്ചിരുന്നതായും കണ്ടെത്തിയിട്ടുണ്ട്.
കേസിലെ പ്രതിയായ 17-കാരന്റെ മുൻ കാമുകിയുടെ ഇപ്പോഴത്തെ ആൺസുഹൃത്തിനെ വധിക്കുകയായിരുന്നു ക്രിമിനൽ സംഘത്തിന്റെ യഥാർത്ഥ ലക്ഷ്യം. അയാളെ നേരിട്ട് സംഭവസ്ഥലത്തേക്ക് എത്തിക്കാൻ സാധിക്കാതെ വന്നതോടെയാണ് ആൺസുഹൃത്തിന്റെ സുഹൃത്തും തികച്ചും നിരപരാധിയുമായ അഭിറാമിനെ ഇവർ തന്ത്രപൂർവ്വം വിളിച്ചുവരുത്തി കരുവാക്കിയത്. പ്രതികളിലൊരാളായ അനന്തയുടെ ഇൻസ്റ്റഗ്രാം അക്കൗണ്ടിൽ നിന്ന് ദിവസങ്ങളോളം സന്ദേശങ്ങൾ അയച്ചാണ് ഒടുവിൽ ഞായറാഴ്ച വൈകിട്ട് നാല് മണിയോടെ അഭിറാമിനെ പാങ്ങപ്പാറയിലെ വിജനമായ പുരയിടത്തിലേക്ക് എത്തിച്ചത്.
സ്ഥലത്ത് കാത്തുനിന്നിരുന്ന ക്രിമിനൽ കേസ് പ്രതിയായ ഉമറും 17-കാരനായ പ്രതിയും ചേർന്ന് ആക്രമണം അഴിച്ചുവിടുകയായിരുന്നു. ചതി തിരിച്ചറിഞ്ഞ് രക്ഷപ്പെടാൻ ശ്രമിച്ച അഭിറാമിനെ മർദ്ദിച്ച് അവശനാക്കിയ ശേഷം കഴുത്തുഞെരിച്ച് കൊലപ്പെടുത്തുകയായിരുന്നുവെന്ന് പോലീസ് വ്യക്തമാക്കി.
