കെഎസ്ഇബി ചെയർമാന്റെ സ്ഥലംമാറ്റം ഭരണപരമായ സ്വാഭാവിക നടപടി മാത്രമാണെന്നും മറ്റ് നിരവധി മുതിർന്ന ഉദ്യോഗസ്ഥരെയും ഇതോടൊപ്പം മാറ്റിയിട്ടുണ്ടെന്നും മുഖ്യമന്ത്രി വ്യക്തമാക്കി. ഹിമാചൽ പ്രദേശ് സർക്കാരുമായും സ്വകാര്യ സ്ഥാപനമായ ജിഎൻഎയുമായും (GNA) വൈദ്യുതി വാങ്ങുന്നതുമായി ബന്ധപ്പെട്ട നിർദ്ദേശങ്ങൾ സർക്കാരിന്റെ പരിഗണനയിലുണ്ടായിരുന്നു. ഹിമാചലിൽ നിന്ന് വാങ്ങുന്നതിനേക്കാൾ 2,000 കോടി രൂപയുടെ സാമ്പത്തിക ലാഭം ജിഎൻഎയിൽ നിന്ന് വൈദ്യുതി ലഭ്യമാക്കുന്നതിലൂടെ സംസ്ഥാനത്തിന് ലഭിക്കുമെന്നും പീക്ക് അവർ സമയങ്ങളിൽ ഇവർ കൂടുതൽ വൈദ്യുതി നൽകുമെന്നും അദ്ദേഹം പറഞ്ഞു.
ഹിമാചലിൽ നിന്ന് വൈദ്യുതിയെത്തിച്ചാൽ 805 രൂപ അധിക ബാധ്യത വരുമെന്നും അവിടെയും ഇടനിലക്കാരുടെ സാന്നിധ്യമുണ്ടെന്നും മുഖ്യമന്ത്രി ചൂണ്ടിക്കാട്ടി. 2,223 കോടി രൂപയുടെ അധിക സാമ്പത്തിക ഭാരം ഒഴിവാക്കുകയെന്ന ലക്ഷ്യത്തോടെയാണ് ഹിമാചലുമായുള്ള കരാർ ഒഴിവാക്കിയത്. ജിഎൻഎയുമായുള്ള വൈദ്യുതി കരാറിനെ വകുപ്പ് മന്ത്രിയോ കെഎസ്ഇബി ചെയർമാനോ എതിർത്തിട്ടില്ലെന്നും അദ്ദേഹം വ്യക്തമാക്കി.
പിണറായി സർക്കാരിന്റെ കാലത്തും ജിഎൻഎയിൽ നിന്ന് വൈദ്യുതി വാങ്ങിയിട്ടുണ്ടെന്ന് മുഖ്യമന്ത്രി ഓർമ്മിപ്പിച്ചു. 2025-26 കാലഘട്ടത്തിൽ എൽഡിഎഫ് സർക്കാരും സ്വകാര്യ മേഖലയിൽ നിന്ന് വൈദ്യുതി വാങ്ങിയിട്ടുണ്ടെന്നും അദാനിയിൽ നിന്നടക്കം അന്ന് വൈദ്യുതി ശേഖരിച്ചിരുന്നതായും മുഖ്യമന്ത്രി കൂട്ടിച്ചേർത്തു.
