കൊച്ചി: മുസ്ലിം യൂത്ത് ലീഗ് സംസ്ഥാന സമ്മേളനത്തിന്റെ പ്രചാരണ പോസ്റ്ററിൽ കാവി നിറത്തിലുള്ള താമര രൂപം ഉൾപ്പെട്ടതുമായി ബന്ധപ്പെട്ട വിമർശനങ്ങൾക്ക് മറുപടിയുമായി ജനറൽ സെക്രട്ടറി പി.കെ. ഫിറോസ്. പോസ്റ്ററിലുള്ളത് ഭരണകൂട ഫാഷിസത്തെയും തിരുത്തലുകളെയും അടയാളപ്പെടുത്തുന്ന പ്രതീകാത്മക ചിത്രമാണെന്ന് അദ്ദേഹം വ്യക്തമാക്കി.
താമര ഇതളുകൾ പോലെ ചെത്തിവെച്ച കാവി പെൻസിൽ ചിത്രീകരിച്ചതിനെതിരെ ഉയർന്ന ചോദ്യങ്ങൾക്കാണ് അദ്ദേഹം വിശദീകരണം നൽകിയത്. മതേതര മൂല്യങ്ങളെ ഇല്ലാതാക്കി പുതിയ ചരിത്രം സൃഷ്ടിക്കാൻ ശ്രമിക്കുന്ന ഫാഷിസ്റ്റുകളെയാണ് കാവി പെൻസിൽ സൂചിപ്പിക്കുന്നതെന്നും, യഥാർത്ഥ ഇന്ത്യയുടെ ആത്മാവിനെ മാറ്റിയെഴുതുന്ന ആ പെൻസിലിന്റെ മുന ഒടിഞ്ഞു തുടങ്ങിയതിനെയാണ് ചിത്രം പ്രതിഫലിപ്പിക്കുന്നതെന്നും ഫിറോസ് പറഞ്ഞു.
പോസ്റ്ററിലുള്ള പച്ച ഇറേസർ പ്രതീക്ഷയുടെയും വികാസത്തിന്റെയും അടയാളമാണെന്നും, കാവി അധിഷ്ഠിതമായ എഴുത്തുകളെ മായ്ച്ചുകളയാനും തിരുത്താനുമാണ് അതവിടെ നൽകിയിരിക്കുന്നതെന്നും അദ്ദേഹം ചൂണ്ടിക്കാട്ടി. 'ജെൻസി' തലമുറയുടെ പോരാട്ടം വലിയ പ്രതീക്ഷയാണെന്നും പി.കെ. ഫിറോസ് കൂട്ടിച്ചേർത്തു.
