കൊച്ചി: വിവാദ യൂട്യൂബർ ഷാജൻ സ്കറിയക്കെതിരായ അപകീർത്തിക്കേസിൽ യാതൊരുവിധ ഒത്തുതീർപ്പിനും തയ്യാറല്ലെന്നും നിയമനടപടികളുമായി ശക്തമായി മുന്നോട്ടുപോകുമെന്നും ലുലു ഗ്രൂപ്പ്. മാപ്പ് പറയുന്നത് അവരുടെ വ്യക്തിപരമായ കാര്യം മാത്രമാണെന്നും എന്നാൽ നിയമം നിയമത്തിന്റെ വഴിക്ക് തന്നെ പോകുമെന്നും ലുലു കമ്മ്യൂണിക്കേഷൻ മേധാവി വി. നന്ദകുമാർ വ്യക്തമാക്കി.
ക്ലിക്ക് ബൈറ്റുകൾ ഉണ്ടാക്കാനും കാഴ്ച്ചക്കാരുടെ എണ്ണം വർദ്ധിപ്പിക്കാനുമായാണ് മാന്യമായി പ്രവർത്തിക്കുന്ന ഒരു സ്ഥാപനത്തിനെതിരെ ഇത്തരത്തിലുള്ള വ്യാജ പ്രചാരണങ്ങൾ അഴിച്ചുവിടുന്നത്. അഭിപ്രായസ്വാതന്ത്ര്യം ഉറപ്പുനൽകുന്ന ജനാധിപത്യ രാജ്യമാണെങ്കിലും ഒരു സ്ഥാപനത്തെ മനഃപൂർവം അപകീർത്തിപ്പെടുത്താനുള്ള നീക്കങ്ങൾ അനുവദിക്കാനാകില്ലെന്നും അദ്ദേഹം ചൂണ്ടിക്കാട്ടി.
ആഗോളതലത്തിൽ നിരവധിയാളുകൾ ജോലി ചെയ്യുന്ന സ്ഥാപനത്തിനും ചെയർമാൻ എം.എ. യൂസഫലിക്കുമെതിരെ നടക്കുന്ന അധിക്ഷേപങ്ങളെ പ്രതിരോധിക്കാൻ ലുലുവിന്റെ ലീഗൽ സെൽ കൃത്യമായി ഇടപെടും. രാജ്യത്തെ നീതിന്യായ വ്യവസ്ഥയിൽ പൂർണ്ണ വിശ്വാസമുണ്ടെന്നും നിയമപരമായ വഴിയിലൂടെ തന്നെ തുടർനടപടികൾ സ്വീകരിക്കുമെന്നും നന്ദകുമാർ കൂട്ടിച്ചേർത്തു.
