കോഴിക്കോട്: സംസ്ഥാന സ്കൂൾ കായികമേളയിലെ ഭക്ഷണവിതരണത്തിൽ പുഴുവിനെ കണ്ടെത്തിയെന്ന പേരിൽ സമൂഹമാധ്യമങ്ങൾ വഴി വ്യാജ പ്രചാരണം നടത്തിയ കേസിൽ അറസ്റ്റിലായ അധ്യാപകൻ ജിജോ ജെയിംസിന് കുന്ദമംഗലം മജിസ്ട്രേറ്റ് കോടതി ജാമ്യം അനുവദിച്ചു. എറണാകുളം ശാലേം വിഎച്ച്എസ് അധ്യാപകനായ ഇയാളെ സംഭവത്തെത്തുടർന്ന് നേരത്തെ സർവീസിൽ നിന്നും അന്വേഷണവിധേയമായി സസ്‌പെൻഡ് ചെയ്തിരുന്നു.
മേളയിലെ ഭക്ഷണവിതരണ കേന്ദ്രത്തിൽ നിന്നുള്ളതാണെന്ന പേരിൽ ഭക്ഷണത്തിൽ പുഴുവുണ്ടെന്ന് വരുത്തിത്തീർത്ത് ഇയാൾ സമൂഹമാധ്യമങ്ങളിൽ ലൈവ് വീഡിയോ പങ്കുവെക്കുകയായിരുന്നു. കായികമേളയുടെ നടത്തിപ്പിന് വിഘാതമുണ്ടാക്കാനും പൊതുജനങ്ങളിൽ ഭീതി പരത്തി സമാധാനാന്തരീക്ഷം തകർക്കാനുമായി ബോധപൂർവം വ്യാജ വാർത്ത നിർമ്മിച്ചു പ്രചരിപ്പിച്ചു എന്ന കുറ്റങ്ങളാണ് കുന്ദമംഗലം പോലീസ് രജിസ്റ്റർ ചെയ്ത എഫ്ഐആറിലുള്ളത്.
മേളയുടെ സൽപ്പേരിന് കളങ്കം വരുത്താൻ ആസൂത്രിത ഗൂഢാലോചന നടന്നുവെന്ന് ചൂണ്ടിക്കാട്ടി സംഘാടകരും മന്ത്രിയും നൽകിയ ഔദ്യോഗിക പരാതിയുടെ അടിസ്ഥാനത്തിലായിരുന്നു പോലീസിന്റെ അറസ്റ്റ് നടപടി.
