തിരുവനന്തപുരം: കേരള കോൺഗ്രസ് ചെയർമാൻ പി.ജെ. ജോസഫിന് കാബിനറ്റ് പദവി നൽകേണ്ടതില്ലെന്ന് കോൺഗ്രസ് നേതൃത്വം തീരുമാനിച്ചു. ജോസഫിന്റെ മകൻ അപു ജോൺ നിലവിൽ കാബിനറ്റ് റാങ്കോടെ ചീഫ് വിപ്പായി തുടരുന്ന സാഹചര്യത്തിൽ, ഒരേ കുടുംബത്തിലെ രണ്ട് പേർക്ക് കാബിനറ്റ് പദവി നൽകുന്നത് പൊതുവിമർശനങ്ങൾക്ക് വഴിവെക്കുമെന്നാണ് പാർട്ടിയുടെ വിലയിരുത്തൽ; വിഷയത്തിൽ യുഡിഎഫ് മുന്നണിയിൽ നേരത്തെ തന്നെ കടുത്ത എതിർപ്പും തർക്കങ്ങളും നിലനിന്നിരുന്നു.
നിയമസഭാ തെരഞ്ഞെടുപ്പിൽ മത്സരിക്കാതെ ഒഴിഞ്ഞുനിന്ന പി.ജെ. ജോസഫിന്, യുഡിഎഫ് അധികാരത്തിൽ വന്നാൽ കാബിനറ്റ് റാങ്കോടെ ഉന്നത പദവി നൽകാമെന്ന് നേതൃത്വം ഉറപ്പുനൽകിയിരുന്നതായി കേരള കോൺഗ്രസ് അവകാശപ്പെടുന്നുണ്ട്. എം.കെ. മുനീറിനെ ഭരണപരിഷ്കാര കമ്മീഷൻ അധ്യക്ഷനായും ജി. ദേവരാജനെ ഡൽഹിയിലെ പ്രത്യേക പ്രതിനിധിയായും നിയമിച്ചിട്ടും ജോസഫിന്റെ പദവി പ്രഖ്യാപനം വൈകുന്നതിൽ പാർട്ടിയിൽ അമർഷം ശക്തമായിരുന്നു.
വയോജന കമ്മീഷൻ അധ്യക്ഷ സ്ഥാനം ഉൾപ്പെടെയുള്ള പ്രധാന പദവികളാണ് പി.ജെ. ജോസഫിനായി കേരള കോൺഗ്രസ് നേതൃത്വം പ്രധാനമായും പ്രതീക്ഷിച്ചിരുന്നത്.
