തിരുവനന്തപുരം: കെ.എസ്.ടി.പി പദ്ധതിയിലെ കരാർ ക്രമക്കേടിലും പതി-ബെൽ കമ്പനി പ്രോജക്ട് മാനേജർ ലീ സീ ബീനിന്റെ ആത്മഹത്യയിലും മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയുള്ള വിജിലൻസ് അന്വേഷണവുമായി മുന്നോട്ട് പോകാൻ ആഭ്യന്തര വകുപ്പ് തീരുമാനിച്ചു. പ്രാഥമിക വിജിലൻസ് റിപ്പോർട്ടിന്റെ പശ്ചാത്തലത്തിൽ അന്വേഷണം വ്യാപിപ്പിക്കുന്നതിനായി ഡെപ്യൂട്ടി ഡയറക്ടർ ഓഫ് വിജിലൻസിനോട് സർക്കാർ നിയമോപദേശം തേടിയിട്ടുണ്ട്; നിയമോപദേശം ലഭിക്കുന്ന മുറയ്ക്ക് മറ്റ് വകുപ്പുകൾ ഉൾപ്പെടുത്തിയുള്ള നടപടികളിലേക്ക് കടക്കും.
കേരളത്തിൽ പൊതുമരാമത്ത് സെക്രട്ടറിയായിരുന്ന കാലത്ത് ഗ്യാനേഷ് കുമാർ നടത്തിയ അഴിമതിയും രണ്ട് കോടി രൂപ കൈക്കൂലി ആവശ്യപ്പെട്ട് പതി-ബെൽ കമ്പനിയുടെ 14 കോടി രൂപയുടെ നാല് ബില്ലുകൾ തടഞ്ഞുവെച്ചതുമാണ് ലീ സീ ബീനിന്റെ മരണത്തിന് കാരണമായതെന്ന് കൊല്ലം സ്വദേശിയും മുൻ കരാറുകാരനുമായ വി.ഒ. സാജൻ പുതിയ പരാതി നൽകിയിരുന്നു. ഈ പുതിയ ആരോപണവും നിലവിലെ വിജിലൻസ് അന്വേഷണത്തിന്റെ പരിധിയിൽ ഉൾപ്പെടുത്താനാണ് ആഭ്യന്തര വകുപ്പിന്റെ തീരുമാനം.
2007-2012 കാലയളവിലെ മുൻ വിജിലൻസ് പരിശോധനയിൽ അപാകതകളൊന്നും കണ്ടെത്താത്തതിനാൽ പുനരന്വേഷണ സാധ്യതയില്ലെന്ന വാദങ്ങൾ ആഭ്യന്തര വകുപ്പ് പൂർണ്ണമായി തള്ളി. തുടരന്വേഷണത്തിൽ സാജൻ ഉന്നയിച്ച പുതിയ തെളിവുകളും ആരോപണങ്ങളും നിർണ്ണായകമാകുമെന്നാണ് അന്വേഷണ സംഘത്തിന്റെ വിലയിരുത്തൽ.
