തിരുവനന്തപുരം: സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളിലെ ജനപ്രതിനിധികളുടെ ഓണറേറിയം 100 ശതമാനം വർദ്ധിപ്പിക്കാൻ സർക്കാർ നിയോഗിച്ച സമിതി ശുപാർശ നൽകി. നിലവിൽ നൽകുന്ന തുക തീർത്തും അപര്യാപ്തമാണെന്ന് വ്യക്തമാക്കിയ സമിതി, ഗ്രാമ-ബ്ലോക്ക്-ജില്ലാ പഞ്ചായത്തുകളിലെയും മുനിസിപ്പാലിറ്റി, കോർപ്പറേഷൻ എന്നിവിടങ്ങളിലെയും അംഗങ്ങൾക്ക് ഇരട്ടി തുക ഓണറേറിയമായി നൽകണമെന്നാണ് നിർദ്ദേശിച്ചിരിക്കുന്നത്. തദ്ദേശ സ്വയംഭരണ വകുപ്പ് സ്പെഷ്യൽ സെക്രട്ടറി ഷാനവാസ് ഐഎഎസ് അധ്യക്ഷനായ സമിതിയാണ് റിപ്പോർട്ട് സർക്കാരിന് സമർപ്പിച്ചത്.
സമിതിയുടെ റിപ്പോർട്ട് വിശദമായി പരിശോധിച്ച ശേഷമായിരിക്കും സർക്കാർ അന്തിമ തീരുമാനമെടുക്കുക. അതേസമയം, വർദ്ധിപ്പിച്ച ഓണറേറിയം അടുത്തവർഷം ജനുവരി ഒന്നു മുതൽ വിതരണം ചെയ്യുമെന്ന് തദ്ദേശസ്വയംഭരണ വകുപ്പ് മന്ത്രി കെ.എം. ഷാജി ഇന്നലെ നിയമസഭയിൽ വ്യക്തമാക്കിയിരുന്നു.
മന്ത്രിമാരുടെയും എംഎൽഎമാരുടെയും ശമ്പളം ഉയർത്താൻ കഴിഞ്ഞദിവസം സർക്കാർ തീരുമാനമെടുത്തതിന് പിന്നാലെയാണ് തദ്ദേശ പ്രതിനിധികളുടെയും ആനുകൂല്യം വർദ്ധിപ്പിക്കാനുള്ള നീക്കം.
