തിരുവനന്തപുരം: പുതിയ മദ്യനയം പ്രഖ്യാപിക്കുന്നതുവരെ പുതിയ ബാറുകൾ അനുവദിക്കരുതെന്ന സർക്കാർ ഉത്തരവ് ലംഘിച്ച രണ്ട് എക്സൈസ് ഡെപ്യൂട്ടി കമ്മീഷണർമാർക്കെതിരെ സസ്പെൻഷൻ നടപടി. എറണാകുളം ഡെപ്യൂട്ടി കമ്മീഷണർ പി.കെ. സതീഷ്, കോട്ടയത്തിന്റെ അധിക ചുമതല വഹിക്കുന്ന പത്തനംതിട്ട ഡെപ്യൂട്ടി കമ്മീഷണർ ഷിബു പി.എൽ. എന്നിവരെയാണ് സർവീസിൽ നിന്ന് നീക്കുന്നത്; ഇതുസംബന്ധിച്ച ഔദ്യോഗിക ഉത്തരവ് ഉടൻ പുറത്തിറങ്ങും.
യുഡിഎഫ് സർക്കാരിന്റെ മദ്യനയം വരാനിരിക്കെ, നിലവിലുള്ള ബിയർ ആൻഡ് വൈൻ പാർലറുകളുടെ ലൈസൻസ് തരംമാറ്റിയാണ് ഇവർ പുതിയ ബാറുകൾ തുറക്കാൻ അനുമതി നൽകിയത്. എറണാകുളം ജില്ലയിലെ രണ്ടിടങ്ങളിലും കോട്ടയത്തെ ഒരിടത്തുമാണ് ഇത്തരത്തിൽ ബാർ ലൈസൻസുകൾ പുതുതായി അനുവദിച്ചത്.
ഉദ്യോഗസ്ഥരുടെ ഭാഗത്തുനിന്നുണ്ടായ ഗുരുതരമായ ചട്ടലംഘനത്തിൽ എക്സൈസ് മന്ത്രി എം. ലിജു കടുത്ത അതൃപ്തി രേഖപ്പെടുത്തി. സംഭവത്തിൽ അടിയന്തരമായി അന്വേഷണം നടത്തി വിശദമായ റിപ്പോർട്ട് സമർപ്പിക്കാൻ എക്സൈസ് കമ്മീഷണർക്ക് മന്ത്രി നിർദ്ദേശം നൽകി.
