കൊച്ചി: ചേരാനല്ലൂർ വാഹനാപകടക്കേസിലെ പതിനേഴുകാരനായ പ്രതിയുടെ ജാമ്യം റദ്ദാക്കണമെന്ന് ആവശ്യപ്പെട്ട് സമർപ്പിച്ച അപ്പീൽ പരിഗണിക്കുന്നതിനിടെ കോടതിയിൽ നാടകീയ രംഗങ്ങൾ. സ്ത്രീകളുടെയും കുട്ടികളുടെയും കുറ്റകൃത്യങ്ങൾ പരിഗണിക്കുന്ന പ്രത്യേക കോടതിയിലാണ് വാദത്തിനിടെ കുടുംബാംഗങ്ങൾ തർക്കമുന്നയിച്ചതും പ്രോസിക്യൂഷന് കോടതിയുടെ രൂക്ഷവിമർശനം നേരിട്ടതും. പ്രോസിക്യൂഷനൊപ്പം മരിച്ച ജയബാലകൃഷ്ണന്റെ കുടുംബവും ഹർജി നൽകിയിരുന്നു.
കേസിൽ പ്രോസിക്യൂഷൻ സമർപ്പിച്ച അപ്പീലിൽ പതിനേഴുകാരന്റെ പേരുൾപ്പെടെയുള്ള മുഴുവൻ വിവരങ്ങളും വെളിപ്പെടുത്തിയതിനെ കോടതി രൂക്ഷമായി ചോദ്യം ചെയ്തു. പ്രായപൂർത്തിയാകാത്ത പ്രതിയുടെ വ്യക്തിവിവരങ്ങൾ പരസ്യപ്പെടുത്തുന്നത് രണ്ട് വർഷം വരെ തടവുശിക്ഷ ലഭിക്കാവുന്ന ക്രിമിനൽ കുറ്റമാണെന്ന് ഓർമ്മിപ്പിച്ച കോടതി, വിവരങ്ങൾ നീക്കം ചെയ്ത് പുതിയ അപ്പീൽ നൽകാൻ ഉത്തരവിട്ടു.
അതിനിടെ, നിലവിലെ അഭിഭാഷകൻ തങ്ങളെ നിർബന്ധിച്ച് വക്കാലത്തിൽ ഒപ്പിടീക്കുകയായിരുന്നുവെന്ന് മരിച്ച ജയബാലകൃഷ്ണന്റെ ബന്ധു ജയലക്ഷ്മി കോടതിയിൽ ആരോപിച്ചു. എന്നാൽ മകളാണ് തനിക്ക് വക്കാലത്ത് നൽകിയതെന്നും അവർ നേരിട്ട് ഹാജരായി നിലപാട് വ്യക്തമാക്കുമെന്നും അഭിഭാഷകൻ കോടതിയെ അറിയിച്ചു. കുടുംബത്തിനുള്ളിലെ ആഭ്യന്തര തർക്കങ്ങളാണ് കോടതിമുറിയിലെ ആശയക്കുഴപ്പങ്ങൾക്ക് കാരണമായതെന്നാണ് വിവരം.
