കൊച്ചി: വിവാദമായ ചേരാനല്ലൂർ വാഹനാപകടക്കേസിൽ ഒരു ജഡ്ജിയും തന്നോട് സംസാരിച്ചിട്ടില്ലെന്നും പ്രതികളുമായി ബന്ധമുള്ള ആരും തന്നെ സമീപിച്ചിട്ടില്ലെന്നും മുൻ കൊച്ചി സിറ്റി പോലീസ് കമ്മീഷണർ കാളിരാജ് മഹേഷ് കുമാർ. ഇനി വിശദീകരണത്തിന് അവസരം ലഭിച്ചേക്കില്ലെന്നതിനാലാണ് കാര്യങ്ങൾ തുറന്നുപറയുന്നതെന്നും, തുടക്കം മുതൽ അന്വേഷണം കൃത്യമായ ദിശയിലാണ് മുന്നോട്ടുപോയതെന്നും അദ്ദേഹം വ്യക്തമാക്കി.
കേസിന്റെ അന്വേഷണ മേൽനോട്ടത്തിൽ വീഴ്ച സംഭവിച്ചെന്ന വിലയിരുത്തലിന്റെയും എഡിജിപി പി. വിജയന്റെ റിപ്പോർട്ടിന്റെയും പശ്ചാത്തലത്തിലാണ് കാളിരാജ് മഹേഷ് കുമാറിനെ സ്ഥാനത്തുനിന്ന് നീക്കാൻ ആഭ്യന്തരമന്ത്രി രമേശ് ചെന്നിത്തല ഉത്തരവിട്ടത്. സംഭവം കൈകാര്യം ചെയ്യുന്നതിൽ പോലീസിന് ഗുരുതര വീഴ്ചയുണ്ടായെന്ന് മന്ത്രി നേരത്തെ ചൂണ്ടിക്കാട്ടിയിരുന്നു.
കേസിലെ വീഴ്ചകളുടെ പേരിൽ എസ്എച്ച്ഒ വിശ്വജിത്ത്, സിഐ ശ്യാംകുമാർ, എഎസ്ഐ മനോജ്, സിപിഒ അരുൺ എന്നീ നാല് ഉദ്യോഗസ്ഥരെ വകുപ്പ് നേരത്തെ തന്നെ സസ്പെൻഡ് ചെയ്തിരുന്നു.
