കൊച്ചി: കാലടി ശ്രീശങ്കരാചാര്യ സംസ്കൃത സർവകലാശാലയിൽ സസ്പെൻഷനിലായ 16 വിദ്യാർത്ഥികൾക്ക് നവംബർ നാലിന് തുടങ്ങുന്ന പരീക്ഷകൾ എഴുതാൻ കേരള ഹൈക്കോടതി അനുമതി നൽകി. ജസ്റ്റിസ് പി.വി. കുഞ്ഞികൃഷ്ണന്റേതാണ് ഉത്തരവ്. വിദ്യാർത്ഥികളിൽ നിന്ന് പരീക്ഷാ ഫീസ് ഈടാക്കി അവരെ പരീക്ഷയിൽ പങ്കെടുപ്പിക്കാൻ കോടതി സർവകലാശാലാ അധികൃതർക്ക് നിർദ്ദേശം നൽകി.
കോടതി ഉത്തരവ് പ്രകാരം വിദ്യാർത്ഥികൾ നാളെ തന്നെ പരീക്ഷാ ഫീസ് അടയ്ക്കണം. അതേസമയം, പരീക്ഷയെഴുതാൻ അനുവദിച്ചുകൊണ്ടുള്ള ഈ ഉത്തരവ് നിലവിലെ ഹർജിയിലെ അന്തിമ കോടതി വിധിക്ക് വിധേയമായിരിക്കുമെന്നും ബെഞ്ച് വ്യക്തമാക്കി.
വൈസ് ചാൻസലർക്കെതിരെ പ്രതിഷേധം നടത്തിയതിനാണ് സർവകലാശാല തങ്ങൾക്കെതിരെ നടപടിയെടുത്തതെന്നും കഴിഞ്ഞ 60 ദിവസമായി സസ്പെൻഷനിലാണെന്നും വിദ്യാർത്ഥികൾ കോടതിയെ അറിയിച്ചിരുന്നു.
