തിരുവനന്തപുരം: നിപ ബാധിതർക്ക് കാലാവധി തീർന്ന മരുന്ന് നൽകിയെന്ന പ്രചാരണം തള്ളി ആരോഗ്യ രംഗത്തെ വിദഗ്ധർ. 2023-25 കാലയളവിൽ നിപ ബാധിച്ച് മരണപ്പെട്ട ആറുപേർക്കും റെംഡെസിവിർ മരുന്ന് നൽകിയിരുന്നില്ലെന്ന് ഡോ. അനൂപ് കുമാർ എ.എസ് വ്യക്തമാക്കി. ഈ മരുന്ന് നൽകിയ ഏഴ് രോഗികളും രോഗമുക്തി നേടിയ സാഹചര്യത്തിൽ, കാലാവധി കഴിഞ്ഞ മരുന്ന് മൂലമാണ് മരണം സംഭവിച്ചതെന്ന വാദത്തിന് യാതൊരു പ്രസക്തിയുമില്ലെന്ന് അദ്ദേഹം റിപ്പോർട്ടറിനോട് പറഞ്ഞു.
അതേസമയം, നിപ ബാധിതർക്ക് നൽകിയത് കാലാവധി കഴിഞ്ഞ മരുന്നുകളാണെന്ന സംശയത്തിൽ സർക്കാർ പ്രഖ്യാപിച്ച അന്വേഷണവുമായി മുന്നോട്ട് പോകും. സംഭവത്തിൽ പ്രത്യേക മെഡിക്കൽ ബോർഡ് രൂപീകരിച്ച് പരിശോധന നടത്തുമെന്ന് ആരോഗ്യമന്ത്രി കെ. മുരളീധരൻ നിയമസഭയിൽ അറിയിച്ചിരുന്നു. മാത്യു കുഴൽനാടൻ എംഎൽഎ ഉന്നയിച്ച ചോദ്യത്തിനുള്ള മറുപടിയിലാണ് ആരോഗ്യമന്ത്രി ഇക്കാര്യം വ്യക്തമാക്കിയത്.
