കൊച്ചി: ഫോർട്ട് കൊച്ചിയിൽ വാറന്റ് പ്രതിയെ പിടികൂടാനെത്തിയ എക്സൈസ് സംഘം വീട് മാറി റെയ്ഡ് നടത്തി ഭീകരാന്തരീക്ഷം സൃഷ്ടിച്ചതായി പരാതി. ഫോർട്ട് കൊച്ചി അധികാരി വളപ്പിന് സമീപത്തെ ഫെർണാണ്ടസ് ഗാർഡനിൽ വ്യാഴാഴ്ച പുലർച്ചെ നാലരയോടെയാണ് സംഭവം. വാറന്റ് പ്രതി താമസിച്ചിരുന്ന വീടിന് പകരം എടപ്പാൾ സ്വദേശികളായ ദമ്പതികൾ വാടകയ്ക്ക് താമസിക്കുന്ന വീട്ടിലേക്കാണ് കട്ടപ്പനയിൽ നിന്നെത്തിയ എക്സൈസ് ഉദ്യോഗസ്ഥർ അതിക്രമിച്ചു കയറിയത്.
സംഭവസമയത്ത് ഭർത്താവ് ജോലിയിലായിരുന്നതിനാൽ വീട്ടമ്മ മാത്രമാണ് അകത്തുണ്ടായിരുന്നത്. ജനാലയിലൂടെ അകത്തേക്ക് ടോർച്ചടിച്ച സംഘം വാതിൽ തുറന്നില്ലെങ്കിൽ തകർത്ത് അകത്തുകയറുമെന്ന് ഭീഷണിപ്പെടുത്തി; കള്ളന്മാരാണെന്ന് ഭയന്ന വീട്ടമ്മ ഫോർട്ട് കൊച്ചിയിലെ ഹോട്ടലിൽ ജോലിയിലായിരുന്ന ഭർത്താവിനെ ഫോണിൽ വിവരമറിയിക്കുകയായിരുന്നു. സ്ത്രീ മാത്രമാണ് വീടിനുള്ളിലുള്ളതെന്ന് ബഹളം കേട്ടെത്തിയ അയൽവാസി വ്യക്തമാക്കിയിട്ടും വാതിൽ തുറക്കണമെന്ന പിടിവാശിയിൽ ഉദ്യോഗസ്ഥർ ഉറച്ചുനിന്നു.
ജോലിസ്ഥലത്തുനിന്നെത്തിയ ഭർത്താവ് ഐഡന്റിറ്റി കാർഡ് കാണിക്കാൻ ആവശ്യപ്പെട്ടെങ്കിലും യൂണിഫോമിലല്ലാതിരുന്ന ഉദ്യോഗസ്ഥർ അതിന് തയ്യാറായില്ലെന്ന് പരാതിയിൽ പറയുന്നു. സംഘത്തോടൊപ്പമുണ്ടായിരുന്ന വനിതാ ഉദ്യോഗസ്ഥ മാറിനിൽക്കുകയായിരുന്നു. പ്രദേശവാസികൾ തടിച്ചുകൂടിയതോടെ എക്സൈസ് സംഘം സ്ഥലംവിട്ടു; ഇതിനിടെ കടുത്ത ദേഹാസ്വാസ്ഥ്യം അനുഭവപ്പെട്ട വീട്ടമ്മയെ ആശുപത്രിയിൽ പ്രവേശിപ്പിച്ചു. സംഭവത്തിൽ ആദ്യം പരാതി സ്വീകരിക്കാൻ വിമുഖത കാട്ടിയ ഫോർട്ട് കൊച്ചി പോലീസ് വിഷയം വിവാദമായതോടെ അന്വേഷണത്തിൽ ഇടപെട്ടു.
