കൊച്ചി: നടൻ മമ്മൂട്ടിയുമായുള്ള കൂടിക്കാഴ്ചയുടെ പേരിൽ ഉയർന്ന സൈബർ വിമർശനങ്ങൾക്ക് ഫേസ്ബുക്ക് പോസ്റ്റിലൂടെ മറുപടിയുമായി ഡിവൈഎഫ്ഐ സംസ്ഥാന സെക്രട്ടറിയും എംഎൽഎയുമായ എം. വിജിൻ. മമ്മൂട്ടിയുടെ വ്യക്തിപരമായ ക്ഷണം സ്വീകരിച്ചാണ് എസ്എഫ്ഐ, ഡിവൈഎഫ്ഐ സംസ്ഥാന നേതൃത്വങ്ങൾ അദ്ദേഹത്തെ കാണാനെത്തിയതെന്ന് വിജിൻ വ്യക്തമാക്കി. എഴുപത്തിയഞ്ച് പിന്നിട്ട ചലച്ചിത്ര പ്രതിഭയുമായി രാഷ്ട്രീയ-സാംസ്കാരിക കാര്യങ്ങളിലും ജീവിത വീക്ഷണങ്ങളിലും തികച്ചും ജനാധിപത്യപരമായ സംവാദമാണ് നടത്തിയതെന്നും അദ്ദേഹത്തിന്റെ നിരീക്ഷണങ്ങൾ മനുഷ്യത്വപരമായ അനുഭവങ്ങളാണെന്നും വിജിൻ കുറിച്ചു.
വയനാട് ടൗൺഷിപ്പ് സന്ദർശന വേളയിൽ ഉണ്ടായ വിവാദങ്ങൾ അന്നുതന്നെ അവസാനിക്കേണ്ടതായിരുന്നുവെന്ന് അദ്ദേഹം ചൂണ്ടിക്കാട്ടി. സഖാവ് റഫീഖും മമ്മൂട്ടിയും പരസ്പരം സംസാരിച്ച് പരിഹരിച്ച ഒരു വിഷയത്തെ മുൻനിർത്തി ഇപ്പോൾ വീണ്ടും വിമർശനങ്ങൾ ഉന്നയിക്കുന്നത് ശരിയല്ലെന്നും എംഎൽഎ പറഞ്ഞു.
വിവിധ തുറകളിലുള്ള വ്യക്തികളോട് യോജിച്ചും വിയോജിച്ചും ആശയവിനിമയം നടത്താതെ ജനാധിപത്യ പ്രസ്ഥാനങ്ങൾക്ക് മുന്നോട്ടുപോകാനാകില്ലെന്നും വിട്ടുവീഴ്ചയില്ലാത്ത രാഷ്ട്രീയത്തിനൊപ്പം മാനുഷിക മൂല്യങ്ങളും ഉയർത്തിപ്പിടിച്ചാണ് മുന്നേറേണ്ടതെന്നും അദ്ദേഹം കൂട്ടിച്ചേർത്തു.
