തിരുവനന്തപുരം: കടമ്പാട്ടുകോണം–കഴക്കൂട്ടം ദേശീയപാതാ വികസനം അനിശ്ചിതമായി നീളുന്നതിൽ പ്രതിഷേധിച്ച് നിർമ്മാണ ചുമതലയുള്ള ഉദ്യോഗസ്ഥരെ ഓഫീസിലേക്ക് വിളിച്ചുവരുത്തി അടൂർ പ്രകാശ് എം.പി. പ്രവൃത്തികൾ സമയബന്ധിതമായി പൂർത്തിയാക്കിയില്ലെങ്കിൽ ശക്തമായ സമരപരിപാടികളിലേക്ക് കടക്കുമെന്ന് അദ്ദേഹം മുന്നറിയിപ്പ് നൽകി. ജനങ്ങളുടെ ക്ഷമ പരീക്ഷിക്കുന്ന തരത്തിലുള്ള കാലതാമസം അനുവദിക്കാനാകില്ലെന്നും പദ്ധതിയുടെ പുരോഗതി ഉറപ്പാക്കാൻ അടിയന്തര ഇടപെടൽ വേണമെന്നും എം.പി. ആവശ്യപ്പെട്ടു.
നിർമ്മാണം വൈകുന്നത് കാരണം രൂക്ഷമായ ഗതാഗതക്കുരുക്ക്, പൊടിശല്യം, അപകടങ്ങൾ, യാത്രാസമയത്തിലെ വർദ്ധനവ് എന്നിവ ദിവസേന യാത്ര ചെയ്യുന്നവർക്കും നാട്ടുകാർക്കും വലിയ ദുരിതമാണ് സൃഷ്ടിക്കുന്നത്. ഇത് വ്യാപാരികളെയും വിദ്യാർത്ഥികളെയും രോഗികളെയും ഒരുപോലെ ബാധിക്കുന്നതിനാൽ ഓരോ ഘട്ടത്തിനും കൃത്യമായ സമയക്രമം നിശ്ചയിച്ച് നടപ്പാക്കണമെന്നും വകുപ്പുകൾ തമ്മിലുള്ള ഏകോപനക്കുറവ് ഉടൻ പരിഹരിക്കണമെന്നും അദ്ദേഹം നിർദ്ദേശിച്ചു. ഗതാഗത നിയന്ത്രണം ശക്തമാക്കി യാത്രക്കാർക്ക് സുരക്ഷിത പാത ഒരുക്കണമെന്നും എം.പി. ആവശ്യപ്പെട്ടു.
നിർമ്മാണ പ്രവർത്തനങ്ങളുടെ ഗുണനിലവാരം ഉറപ്പുവരുത്തുന്നതിനൊപ്പം പുരോഗതി കൃത്യമായ ഇടവേളകളിൽ റിപ്പോർട്ട് ചെയ്യണമെന്നും ഉദ്യോഗസ്ഥരോട് നിർദ്ദേശിച്ചിട്ടുണ്ട്. ജനപ്രതിനിധികളെയും തദ്ദേശസ്ഥാപനങ്ങളെയും ഉൾപ്പെടുത്തി നിരീക്ഷണ സംവിധാനം ശക്തിപ്പെടുത്തണമെന്ന് വ്യക്തമാക്കിയ എം.പി, വീഴ്ചകൾ ആവർത്തിച്ചാൽ സമരം ആരംഭിക്കുമെന്ന് ആവർത്തിച്ചു.
