കൊച്ചി: സിഎംആർഎൽ-എക്സാലോജിക് സാമ്പത്തിക ഇടപാടിൽ പരാതിക്കാരനായ കെ.എം. ഷാജഹാനെതിരെ രൂക്ഷവിമർശനവുമായി ഹൈക്കോടതി ഡിവിഷൻ ബെഞ്ച്. കോടതിയെ പഠിപ്പിക്കാൻ കെ.എം. ഷാജഹാൻ വരേണ്ടതില്ലെന്ന് വ്യക്തമാക്കിയ കോടതി, ഈ ഇടപാടിൽ പോലീസിന് പരാതി നൽകിയിട്ടുണ്ടോയെന്നും ആരാഞ്ഞു. ഹർജി നൽകാൻ തനിക്ക് നിയമപരമായ അവകാശമുണ്ടെന്ന് ഷാജഹാൻ ആദ്യം ബോധ്യപ്പെടുത്തണമെന്നും കോടതി നിർദേശിച്ചു.
രാജ്യത്തെ ക്രിമിനൽ നടപടിക്രമങ്ങൾ അഴിമതിക്കേസുകൾക്കും ബാധകമാണെന്ന് കോടതി ഓർമ്മിപ്പിച്ചു. ആദ്യം പോലീസിനും തുടർന്ന് ഉന്നതാധികാരിക്കും പരാതി നൽകിയ ശേഷം നടപടിയില്ലെങ്കിൽ സ്വകാര്യ അന്യായവുമായി മജിസ്ട്രേറ്റിനെ സമീപിക്കുകയാണ് ചെയ്യേണ്ടതെന്നും, മജിസ്ട്രേറ്റാണ് പരാതി പോലീസിന് കൈമാറേണ്ടതെന്നും ഡിവിഷൻ ബെഞ്ച് ചൂണ്ടിക്കാട്ടി.
സിംഗിൾ ബെഞ്ച് ഉത്തരവ് എങ്ങനെ അന്തിമ ഉത്തരവാകുമെന്ന് ചോദിച്ച കോടതി, സിംഗിൾ ബെഞ്ചിന് മുകളിൽ ഡിവിഷൻ ബെഞ്ചും അതിനും മുകളിൽ സുപ്രീം കോടതിയും നിലനിൽക്കുന്നുണ്ടെന്ന് ഓർമ്മിപ്പിച്ചു. മാധ്യമങ്ങളും പൊതുസമൂഹവും ഒരുപക്ഷേ ഷാജഹാനെ പിന്തുണച്ചേക്കാമെന്നും എന്നാൽ അതൊന്നും ഹൈക്കോടതിക്ക് ബാധകമല്ലെന്നും ഡിവിഷൻ ബെഞ്ച് വ്യക്തമാക്കി.
