തിരുവനന്തപുരം: ആരോഗ്യവകുപ്പ് രൂപീകരിച്ച പ്രത്യേക ടാസ്ക് ഫോഴ്സിന്റെ അധ്യക്ഷനായ ഉത്തർപ്രദേശ് മുൻ ചീഫ് സെക്രട്ടറി ദീപക് സിംഗാളിനെതിരെ വിജിലൻസ് കേസുകളൊന്നുമില്ലെന്നും 2019-ൽ അദ്ദേഹത്തിന് വിജിലൻസ് ക്ലിയറൻസ് ലഭിച്ചിട്ടുണ്ടെന്നും മുഖ്യമന്ത്രി വി.ഡി. സതീശൻ. നിയമസഭയിൽ അടിയന്തര പ്രമേയ ചർച്ചയ്ക്ക് മറുപടി നൽകവേയാണ് മുഖ്യമന്ത്രി സിംഗാളിന് ക്ലീൻചിറ്റ് നൽകിയത്. ആരോപണങ്ങൾ ഉന്നയിക്കുന്നതിന് മുൻപ് സമിതിയിലെ അംഗങ്ങൾ ആരാണെന്ന് പ്രതിപക്ഷം പരിശോധിക്കണമായിരുന്നുവെന്നും രാജ്യത്തെ പ്രമുഖ വ്യക്തിത്വങ്ങളാണ് ടാസ്ക് ഫോഴ്സിലുള്ളതെന്നും അദ്ദേഹം ചൂണ്ടിക്കാട്ടി.
സർക്കാർ തലത്തിലുള്ള തീരുമാനങ്ങളിൽ പാർട്ടിയുടെ ഇടപെടലുകളില്ലെന്നും കെപിസിസിയല്ല സമിതി അംഗങ്ങളെ നിശ്ചയിച്ചതെന്നും വ്യക്തമാക്കിയ മുഖ്യമന്ത്രി, ഫയലുകളുമായി പാർട്ടി ഓഫീസുകൾ കയറിയിറങ്ങുന്ന രീതിയല്ല കോൺഗ്രസിന്റേതെന്നും ഓർമ്മിപ്പിച്ചു. സ്വകാര്യ ആശുപത്രികളിലെ അമിത ചികിത്സാച്ചെലവുകൾ സാധാരണക്കാരെ ചൂഷണം ചെയ്യുന്ന പശ്ചാത്തലത്തിൽ, പൊതുജനാരോഗ്യ സംവിധാനങ്ങളെ ശാക്തീകരിക്കാൻ യോഗ്യതയുള്ള വിദഗ്ദ്ധരെയാണ് നോളജ് പാർട്ണർമാരായി ഉൾപ്പെടുത്തിയിരിക്കുന്നത്. ആവശ്യമില്ലാത്തവർക്ക് പോലും എംആർഐയും സിടി സ്കാനും നിശ്ചയിക്കുന്ന അണിയറ സിൻഡിക്കേറ്റുകൾക്കെതിരെയുള്ള പോരാട്ടമാണ് സർക്കാർ നടത്തുന്നതെന്നും അദ്ദേഹം വിശദീകരിച്ചു.
എസ്എംഎ മരുന്ന് ടെൻഡറിൽ ഒറ്റക്കമ്പനി മാത്രം പങ്കെടുത്തെന്ന വിമർശനത്തിനും മുഖ്യമന്ത്രി മറുപടി നൽകി. ഇത് പൊതുമരാമത്ത് പാലമോ റോഡോ നിർമ്മിക്കുന്നതുപോലെയല്ലെന്നും, ആവശ്യമായ ജനറിക് മരുന്ന് നിർമ്മിക്കുന്നത് പ്രസ്തുത കമ്പനി മാത്രമാണെന്നും അദ്ദേഹം പറഞ്ഞു. സുപ്രീം കോടതിയുടെയും ഹൈക്കോടതിയുടെയും അനുമതിയോടെയാണ് നടപടികൾ പൂർത്തിയാക്കിയതെന്നും, കുഞ്ഞുങ്ങളുടെ മരുന്നിന് ആറര ലക്ഷം രൂപ ഈടാക്കിയിരുന്ന റോഷെ കമ്പനിക്ക് വേണ്ടി പ്രതിപക്ഷം വാദിക്കരുതെന്നും മുഖ്യമന്ത്രി നിയമസഭയിൽ ആവശ്യപ്പെട്ടു.
