തിരുവനന്തപുരം: 2027 കലണ്ടർ വർഷത്തിലെ പൊതു അവധി ദിനങ്ങൾ സംസ്ഥാന സർക്കാർ പ്രഖ്യാപിച്ചു. ഒക്ടോബർ 18-ന് പുറത്തിറങ്ങിയ കേരള ഗസറ്റിലാണ് 21 പൊതു അവധികൾ ഉൾപ്പെടുന്ന വിജ്ഞാപനം പ്രസിദ്ധീകരിച്ചത്. റംസാൻ, ബക്രീദ്, മുഹറം എന്നീ അവധി ദിനങ്ങൾ ചന്ദ്രദർശനത്തിന് വിധേയമായി മാറാൻ സാധ്യതയുണ്ടെന്ന് വിജ്ഞാപനത്തിൽ വ്യക്തമാക്കിയിട്ടുണ്ട്.
എല്ലാ ഞായറാഴ്ചകളും രണ്ടാം ശനിയാഴ്ചകളും സർക്കാർ ഓഫീസുകൾക്ക് പതിവ് അവധിയായിരിക്കും. എന്നാൽ, ഈസ്റ്റർ (മാർച്ച് 28 - ഞായർ), നബിദിനം (ഓഗസ്റ്റ് 14 - രണ്ടാം ശനി), സ്വാതന്ത്ര്യദിനം (ഓഗസ്റ്റ് 15 - ഞായർ), ഒന്നാം ഓണം (സെപ്റ്റംബർ 11 - രണ്ടാം ശനി), തിരുവോണം (സെപ്റ്റംബർ 12 - ഞായർ), മഹാനവമി (ഒക്ടോബർ 9 - രണ്ടാം ശനി), വിജയദശമി (ഒക്ടോബർ 10 - ഞായർ) എന്നീ ആഘോഷ ദിനങ്ങൾ ഞായറാഴ്ചകളിലും രണ്ടാം ശനിയാഴ്ചകളിലും വരുന്നതിനാൽ ഇവയെ പ്രത്യേകമായി പൊതു അവധി പട്ടികയിൽ ഉൾപ്പെടുത്തിയിട്ടില്ല.
2027-ലെ പൊതു അവധി ദിനങ്ങൾ: മന്നം ജയന്തി (ജനുവരി 2 - ശനി), റിപ്പബ്ലിക് ദിനം (ജനുവരി 26 - ചൊവ്വ), മഹാശിവരാത്രി (മാർച്ച് 6 - ശനി), ഇദുൽ ഫിത്തർ/റംസാൻ (മാർച്ച് 10 - ബുധൻ), പെസഹ വ്യാഴം (മാർച്ച് 25 - വ്യാഴം), ദുഃഖവെള്ളി (മാർച്ച് 26 - വെള്ളി), ഡോ. ബി.ആർ. അംബേദ്കർ ജയന്തി (ഏപ്രിൽ 14 - ബുധൻ), വിഷു (ഏപ്രിൽ 15 - വ്യാഴം), മെയ് ദിനം (മെയ് 1 - ശനി), ഇദുൽ അദ്ഹ/ബക്രീദ് (മെയ് 17 - തിങ്കൾ), മുഹറം (ജൂൺ 15 - ചൊവ്വ), കർക്കടക വാവ് (ഓഗസ്റ്റ് 2 - തിങ്കൾ), ശ്രീകൃഷ്ണ ജയന്തി (ഓഗസ്റ്റ് 24 - ചൊവ്വ), അയ്യങ്കാളി ജയന്തി (ഓഗസ്റ്റ് 28 - ശനി), മൂന്നാം ഓണം (സെപ്റ്റംബർ 13 - തിങ്കൾ), നാലാം ഓണം (സെപ്റ്റംബർ 14 - ചൊവ്വ), ശ്രീനാരായണ ഗുരു ജയന്തി (സെപ്റ്റംബർ 15 - ബുധൻ), ശ്രീനാരായണ ഗുരു സമാധി (സെപ്റ്റംബർ 22 - ബുധൻ), ഗാന്ധി ജയന്തി (ഒക്ടോബർ 2 - ശനി), ദീപാവലി (ഒക്ടോബർ 28 - വ്യാഴം), ക്രിസ്മസ് (ഡിസംബർ 25 - ശനി).
കൂടാതെ മൂന്ന് നിയന്ത്രിത അവധി ദിനങ്ങളും വിജ്ഞാപനത്തിലുണ്ട്: അയ്യാ വൈകുണ്ഠ സ്വാമി ജയന്തി (മാർച്ച് 4, വ്യാഴം - നാടാർ സമുദായത്തിൽപ്പെട്ട സർക്കാർ, അർധസർക്കാർ, പൊതുമേഖലാ ജീവനക്കാർക്കും അധ്യാപകർക്കും), ആവണി അവിട്ടം (ഓഗസ്റ്റ് 17, ചൊവ്വ - ബ്രാഹ്മണ സമുദായത്തിലെ സർക്കാർ ജീവനക്കാർക്ക്), വിശ്വകർമ ദിനം (സെപ്റ്റംബർ 17, വെള്ളി - വിശ്വകർമ സമുദായത്തിലെ സർക്കാർ, അർധസർക്കാർ, പൊതുമേഖലാ ജീവനക്കാർക്കും അധ്യാപകർക്കും).
