തിരുവനന്തപുരം: എസ്എംഎ രോഗികളായ കുട്ടികൾക്ക് പരീക്ഷണാടിസ്ഥാനത്തിലുള്ള മരുന്ന് നൽകിയെന്ന കണ്ടെത്തൽ അതീവ ഞെട്ടലുളവാക്കുന്നതാണെന്നും പിഞ്ചുകുഞ്ഞുങ്ങളുടെ ജീവൻവെച്ച് സർക്കാർ ചൂതാട്ടം നടത്തുകയാണെന്നും പ്രതിപക്ഷ നേതാവ് പിണറായി വിജയൻ. രക്ഷിതാക്കളുടെ പൂർണ്ണ അനുമതിയില്ലാതെ ഇത്തരം മരുന്നുകൾ വിതരണം ചെയ്തതിന്റെ ഉത്തരവാദിത്തത്തിൽ നിന്ന് ആരോഗ്യവകുപ്പിന് കൈകഴുകാനാകില്ലെന്നും കുറ്റക്കാർക്കെതിരെ ശക്തമായ നടപടി വേണമെന്നും അദ്ദേഹം ആവശ്യപ്പെട്ടു.
തിരുവനന്തപുരം എസ്എടി ആശുപത്രി വഴി നൽകിയ മരുന്നുകളുടെ കുപ്പികളിൽ 'Physician Sample' എന്നും 'For Clinical Trials Only' എന്നും രേഖപ്പെടുത്തിയിട്ടുള്ളത് ഡ്രഗ്സ് ആൻഡ് കോസ്മെറ്റിക്സ് ചട്ടങ്ങളുടെയും സംഭരണ മാനദണ്ഡങ്ങളുടെയും ലംഘനമാണ്. രോഗികളുടെ സംഘടനയായ 'ക്യൂർ എസ്എംഎ'യുടെ എതിർപ്പുകൾ തള്ളിയാണ് ദീർഘകാലമായി ഫലപ്രാപ്തി തെളിയിക്കപ്പെട്ട പദ്ധതിയെ തകിടം മറിച്ച് സർക്കാർ ഈ തീരുമാനമെടുത്തത്; പ്രതിപക്ഷ നേതാവെന്ന നിലയിൽ കത്തയച്ചിട്ടും സർക്കാർ പ്രതികരിച്ചില്ലെന്നും അദ്ദേഹം വ്യക്തമാക്കി.
വിഷയത്തിൽ ആരോഗ്യമന്ത്രി തികച്ചും നിരുത്തരവാദപരവും ക്രൂരവുമായ സമീപനമാണ് സ്വീകരിക്കുന്നതെന്ന് പിണറായി വിജയൻ കുറ്റപ്പെടുത്തി. കഴിഞ്ഞ അഞ്ച് മാസത്തിനിടെ കേരളത്തിലെ ആരോഗ്യരംഗം തകർന്നടിഞ്ഞതിന്റെ തെളിവാണിതെന്നും വകുപ്പിന്റെ പരാജയം നിയമസഭയിൽ മന്ത്രിക്ക് തന്നെ സമ്മതിക്കേണ്ടി വന്നിട്ടുണ്ടെന്നും അദ്ദേഹം കൂട്ടിച്ചേർത്തു.
