തിരുവനന്തപുരം: ആരോഗ്യമേഖലയ്ക്കായി രൂപീകരിച്ച ടാസ്ക് ഫോഴ്സ് തികച്ചും സദുദ്ദേശപരമാണെന്ന് മന്ത്രി കെ. മുരളീധരൻ. ടാസ്ക് ഫോഴ്സ് രൂപീകരിക്കുന്നതുമായി ബന്ധപ്പെട്ട കാര്യങ്ങൾ താനും മുഖ്യമന്ത്രിയും ചേർന്ന് കൂടിയാലോചിച്ചാണ് തീരുമാനിച്ചതെന്നും, ഇതിൽ ഉൾപ്പെട്ടിട്ടുള്ള വ്യക്തികളെക്കുറിച്ച് ആവശ്യമുണ്ടെങ്കിൽ പരിശോധന നടത്തി ഉചിതമായ തീരുമാനമെടുക്കുമെന്നും അദ്ദേഹം വ്യക്തമാക്കി.
മുഖ്യമന്ത്രിയും താനും തമ്മിൽ യാതൊരുവിധ പ്രശ്നങ്ങളുമില്ലെന്നും തങ്ങളെ തമ്മിൽ ഭിന്നിപ്പിക്കാൻ ആരും ശ്രമിക്കേണ്ടതില്ലെന്നും മുരളീധരൻ പറഞ്ഞു. എല്ലാ സുപ്രധാന കാര്യങ്ങളും പരസ്പരം ആലോചിച്ചാണ് നടപ്പിലാക്കാറുള്ളതെന്നും, ഇതുമായി ബന്ധപ്പെട്ട കൂടുതൽ വ്യക്തത മുഖ്യമന്ത്രിയുടെ ഓഫീസ് ഉടൻ നൽകുമെന്നും അദ്ദേഹം കൂട്ടിച്ചേർത്തു. ടാസ്ക് ഫോഴ്‌സിന്റെ ചെയർമാൻ മുഖ്യമന്ത്രിയാണെന്നും അദ്ദേഹം ഓർമ്മിപ്പിച്ചു.
