കണ്ണൂർ: കണ്ണൂരിൽ ന്യൂനപക്ഷ വിഭാഗത്തിൽ നിന്നുള്ളയാളെ സ്ഥാനാർത്ഥിയാക്കേണ്ടതായിരുന്നുവെന്നും ആ കാര്യത്തിൽ പാർട്ടിയ്ക്ക് വീഴ്ച പറ്റിയിട്ടുണ്ടെന്നും സിപിഐഎം കണ്ണൂർ ജില്ലാ സെക്രട്ടറി കെ.കെ. രാഗേഷ് വ്യക്തമാക്കി. സിപിഐഎം വിപുലീകൃത ജില്ലാ കമ്മിറ്റി യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. തളിപ്പറമ്പിൽ എസ്ഐആർ തിരിച്ചടിയായെന്നും വലിയ തോതിൽ വോട്ട് ചേർത്തുവെന്നും അദ്ദേഹം പറഞ്ഞു.
നേരത്തെ കണ്ണൂരിൽ ഇടതുപക്ഷത്തിനൊപ്പം നിന്നിരുന്ന ന്യൂനപക്ഷങ്ങളെ കഴിഞ്ഞ നിയമസഭാ തെരഞ്ഞെടുപ്പ് വേളയിൽ തെറ്റിദ്ധരിപ്പിക്കാൻ മുസ്ലീം ലീഗ് മുന്നിൽ നിന്നതായി രാഗേഷ് കുറ്റപ്പെടുത്തി. നുണകളും വർഗീയ പ്രചാരണങ്ങളും അഴിച്ചുവിട്ടതിനെ മറികടന്ന് ക്രൈസ്തവർ ഉൾപ്പെടെയുള്ള ന്യൂനപക്ഷങ്ങളുടെ വിശ്വാസം തിരിച്ചുപിടിക്കാനും ജനങ്ങളുമായുള്ള ബന്ധം ശക്തമാക്കാനും പാർട്ടി വലിയ തോതിൽ ഇടപെടലുകൾ നടത്തുമെന്നും അദ്ദേഹം കൂട്ടിച്ചേർത്തു.
സിപിഐഎം വിശ്വാസികൾക്കെതിരാണെന്ന പ്രചാരണം തെറ്റാണെന്നും പാർട്ടി ഒരിക്കലും വിശ്വാസത്തെ എതിർക്കുന്നില്ലെന്നും രാഗേഷ് ചൂണ്ടിക്കാട്ടി. വർഗീയതയെയാണ് പാർട്ടി എക്കാലത്തും എതിർക്കുന്നതെന്നും അദ്ദേഹം വ്യക്തമാക്കി.
