തിരുവനന്തപുരം: മാസപ്പടി ആരോപണത്തിൽ ഇ.ഡി, എസ്.എഫ്.ഐ.ഒ എന്നീ കേന്ദ്ര ഏജൻസികളുടെ കണ്ടെത്തലുകൾക്ക് പിന്നാലെ വിജിലൻസ് എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തണമെന്ന ഹൈക്കോടതി സിംഗിൾ ബെഞ്ചിന്റെ നിർദേശം നിലനിൽക്കെ, സർക്കാരെടുത്ത നിലപാടിനെതിരെ കോൺഗ്രസിൽ പ്രതിഷേധം ശക്തമാകുന്നു. കേസിൽ എഫ്.ഐ.ആർ രജിസ്റ്റർ ചെയ്യാൻ ആവശ്യമായ തെളിവുകളില്ലെന്നും പ്രാഥമിക അന്വേഷണം മാത്രമേ ആവശ്യമുള്ളൂവെന്നുമുള്ള സർക്കാരിന്റെ വാദമാണ് വിവാദങ്ങൾക്ക് വഴിവെച്ചത്.
ഈ വിഷയത്തിൽ സർക്കാരിനെതിരെ ഒളിയമ്പെയ്ത് സി.ആർ. മഹേഷ് എംഎൽഎ രംഗത്തെത്തി. 'ഗോഡ്ഫാദർ' സിനിമയിൽ കൊല്ലം തുളസിയുടെ കഥാപാത്രം "പഴയതെല്ലാം മറന്നുകൂടെ?" എന്ന് ചോദിക്കുമ്പോൾ, എൻ.എൻ. പിള്ള അവതരിപ്പിച്ച 'അഞ്ഞൂറാൻ' എന്ന കഥാപാത്രം ”മറക്കണോ? പഴയതെല്ലാം ഞാൻ മറക്കണോ? എന്തൊക്കെയാടോ മറക്കേണ്ടത്?” എന്ന് തിരിച്ചുചോദിക്കുന്ന രംഗമാണ് എംഎൽഎ ഫേസ്ബുക്കിൽ പങ്കുവെച്ചത്.
”തൽക്കാലം ഇത് ഇവിടെ കിടക്കട്ടെ ബാക്കി പിന്നെ” എന്ന അടിക്കുറിപ്പോടെ പങ്കുവെച്ച ഈ വീഡിയോ പോസ്റ്റിന് താഴെ ഉമ്മൻ ചാണ്ടിയുടെ ചിത്രങ്ങളടങ്ങിയ പ്രതികരണങ്ങൾ വ്യാപകമായി രേഖപ്പെടുത്തപ്പെട്ടു.
