കൊച്ചി: കടുത്ത സുരക്ഷാഭീഷണികളും നിർമ്മാണപ്പിഴവുകളും നിലനിൽക്കുന്നതിനാൽ മുണ്ടംവേലി പി ആൻഡ് ടി ഫ്ലാറ്റ് വാസയോഗ്യമല്ലെന്നും താമസക്കാരെ സുരക്ഷിതമായ മറ്റൊരു ഇടത്തേക്ക് അടിയന്തരമായി മാറ്റിപ്പാർപ്പിക്കണമെന്നും ഹൈക്കോടതിയിൽ അമിക്കസ് ക്യൂറി റിപ്പോർട്ട് നൽകി. ലൈഫ് മിഷൻ പദ്ധതിയിൽ ഉൾപ്പെടുത്തി 2024-ൽ നിർമ്മിച്ച ഫ്ലാറ്റ് സമുച്ചയത്തിലാണ് ഗുരുതരമായ ഈ ക്രമക്കേടുകൾ കണ്ടെത്തിയത്.

കെട്ടിടത്തിൽ ലിഫ്റ്റോ മറ്റ് സുരക്ഷാ സംവിധാനങ്ങളോ ഇല്ലാത്തതിനൊപ്പം അഗ്നിശമന ഉപകരണങ്ങൾ പൂർണ്ണമായും പ്രവർത്തനരഹിതമാണെന്നും റിപ്പോർട്ടിൽ വ്യക്തമാക്കുന്നു. ഇടിമിന്നൽ പ്രതിരോധ സംവിധാനം എർത്തുമായി ബന്ധിപ്പിച്ചിട്ടില്ലാത്തതും വലിയ അപകടസാധ്യത ഉയർത്തുന്നുണ്ട്.

സെപ്റ്റിക് ടാങ്കിലെ മലിനജലം സമീപപ്രദേശങ്ങളിലേക്ക് പരന്നൊഴുകുകയാണെന്നും അശാസ്ത്രീയമായ സീവേജ് ട്രീറ്റ്‌മെന്റ് പ്ലാന്റ് വലിയ ആരോഗ്യപ്രശ്നങ്ങൾക്ക് വഴിവെക്കുമെന്നും അമിക്കസ് ക്യൂറി ചൂണ്ടിക്കാട്ടി. താമസം ആരംഭിച്ച് രണ്ടാഴ്ചയ്ക്കുള്ളിൽ തന്നെ കെട്ടിടത്തിൽ ശക്തമായ ചോർച്ച അനുഭവപ്പെട്ടതടക്കം ചൂണ്ടിക്കാട്ടി താമസക്കാർ നേരത്തെ തന്നെ നിരന്തര പരാതികൾ ഉന്നയിച്ചിരുന്നു.