കൊച്ചി: നെടുമ്പാശ്ശേരിയിൽ മിനി കൂപ്പർ കാറിടിച്ച് ഉണ്ടായ അപകടക്കേസിലെ മുഖ്യപ്രതി സുഹൈൽ സജീവിന്റെ ശരീരത്തിൽ അനുവദനീയമായ പരിധിയേക്കാൾ അഞ്ചിരട്ടിയിലധികം മദ്യം ഉണ്ടായിരുന്നതായി സാമ്പിൾ പരിശോധനാ ഫലം. രക്തത്തിൽ 30 മില്ലിഗ്രാം വരെ മദ്യമാകാം എന്നിരിക്കെ 150 മില്ലിഗ്രാമിലധികം ആൽക്കഹോളിന്റെ സാന്നിധ്യമാണ് സുഹൈലിന്റെ ശരീരത്തിൽ നിന്ന് കണ്ടെത്തിയത്.

വാഹനം ഓടിക്കുമ്പോൾ സുഹൈൽ അമിതമായി മദ്യപിച്ചിരുന്നുവെന്ന ദൃക്‌സാക്ഷി മൊഴികൾ ശരിവെക്കുന്ന ഞെട്ടിക്കുന്ന റിപ്പോർട്ടാണ് ലഭിച്ചതെന്ന് പോലീസ് വ്യക്തമാക്കി.

പരിശോധനാ ഫലം പുറത്തുവന്ന സാഹചര്യത്തിൽ പ്രതിയുടെ ജാമ്യാപേക്ഷ കോടതിയിൽ എത്തുമ്പോൾ അതിനെ ശക്തമായി എതിർക്കാനാണ് അന്വേഷണ സംഘത്തിന്റെ തീരുമാനം.