കൊച്ചി: നഗരത്തിൽ വായു ഗുണനിലവാര സൂചിക (എക്യുഐ) 188 ലേക്ക് കുതിച്ചുയർന്നതോടെ വായുമലിനീകരണം രൂക്ഷമായ പ്രതിസന്ധി സൃഷ്ടിക്കുന്നു. കൊച്ചിയിലെ വായു ശ്വസിക്കുന്നത് പ്രതിദിനം എട്ട് സിഗരറ്റുകൾ വലിക്കുന്നതിന് തുല്യമാണെന്നാണ് കണ്ടെത്തൽ. അന്താരാഷ്ട്ര തലത്തിൽ ഏറ്റവും കൂടുതൽ വായുമലിനീകരണമുള്ള നഗരങ്ങളുടെ പട്ടികയിൽ 91-ാം സ്ഥാനത്താണ് നിലവിൽ കൊച്ചി.

പൂജ്യം മുതൽ 50 വരെ രേഖപ്പെടുത്തുന്നതാണ് മനുഷ്യന് ശ്വസിക്കാൻ അനുയോജ്യമായ സുരക്ഷിത അളവ് എന്നിരിക്കെ, ഈയടുത്ത് നഗരത്തിൽ രേഖപ്പെടുത്തിയ ഏറ്റവും ഉയർന്ന സൂചിക 248 വരെ എത്തിയിരുന്നു. തൃപ്പൂണിത്തുറ, വൈറ്റില, ഇരുമ്പനം, അമ്പലമുകൾ, ഏലൂർ എന്നീ മേഖലകളിലാണ് മലിനീകരണത്തോത് ഏറ്റവും മോശമായ അവസ്ഥയിലുള്ളത്.

രാവിലെ 6 മുതൽ 8 മണി വരെ അന്തരീക്ഷത്തിൽ മൂടൽമഞ്ഞിന് സമാനമായി കാണപ്പെടുന്നത് അപകടകരമായ പുകപടലങ്ങളാണെന്ന് വിദഗ്ധർ വ്യക്തമാക്കുന്നു. പെരുകുന്ന വാഹനങ്ങൾ, രൂക്ഷമായ ഗതാഗതക്കുരുക്ക്, വ്യവസായശാലകളിൽ നിന്നുള്ള പുറന്തള്ളൽ, നിർമ്മാണ പ്രവർത്തനങ്ങൾ എന്നിവയാണ് നഗരത്തിലെ വായുവിനെ വിഷമയമാക്കുന്ന പ്രധാന ഘടകങ്ങൾ.