തിരുവനന്തപുരം: ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയെ വ്യക്തിപരമായി അധിക്ഷേപിക്കുകയും ഹൈന്ദവ വിശ്വാസങ്ങളെ അവഹേളിക്കുകയും ചെയ്തെന്നാരോപിച്ച് മുൻ ഡിജിപിയും ബിജെപി നേതാവുമായ ആർ. ശ്രീലേഖയ്ക്കെതിരെ തിരുവനന്തപുരം സിറ്റി പോലീസ് കമ്മീഷണർക്ക് കെ.എസ്. ശബരീനാഥൻ പരാതി നൽകി.
ഡൽഹി സമരത്തിന്റെ പശ്ചാത്തലത്തിൽ സംസാരിക്കവെ, അമിതമായി ലഹരി ഉള്ളിൽച്ചെല്ലുമ്പോൾ പ്രകടമാകുന്ന വെപ്രാളവും താണ്ഡവവുമാണ് രാഹുൽ ഗാന്ധി ഡൽഹിയിൽ നടത്തുന്നതെന്ന് ശ്രീലേഖ പ്രസംഗിച്ചിരുന്നു.
പവിത്രമായ താണ്ഡവനൃത്തത്തെ ലഹരി ഉപയോഗിക്കുമ്പോഴുണ്ടാകുന്ന വിഭ്രാന്തിയോട് ഉപമിച്ചതിലൂടെ ശ്രീലേഖ മതവികാരം വ്രണപ്പെടുത്തിയെന്നും പ്രതിപക്ഷ നേതാവിനെ അപകീർത്തിപ്പെടുത്തിയെന്നുമാണ് പരാതിയിലെ പ്രധാന ആക്ഷേപം.
