മലപ്പുറം: വിവിധ വകുപ്പുകളിലായി ജില്ലയിൽ കിഫ്ബി വഴി പ്രഖ്യാപിച്ച 28 പദ്ധതികളിൽ ഭൂരിഭാഗവും എങ്ങുമെത്താതെ കടലാസിൽ ഒതുങ്ങിനിൽക്കുന്നതായി ആക്ഷേപം. ഫണ്ട് ലഭ്യമായിട്ടും കൃത്യമായ ഫോളോ-അപ്പ് ഇല്ലാത്തതും ഉദ്യോഗസ്ഥരുടെ അനാസ്ഥയുമാണ് നിർമ്മാണ പ്രവർത്തനങ്ങൾ വൈകാൻ കാരണമെന്നാണ് റിപ്പോർട്ട്; കിഫ്ബി പുനഃക്രമീകരണത്തോടെ ഈ ഫണ്ട് പൂർണ്ണമായി നഷ്ടപ്പെടുമോയെന്ന ഭീതിയും നിലനിൽക്കുന്നുണ്ട്.
പൊതുവിദ്യാഭ്യാസം, ഉന്നത വിദ്യാഭ്യാസം, കായികം, തദ്ദേശ സ്വയംഭരണം തുടങ്ങിയ വകുപ്പുകളിലെ സ്കൂളുകൾ, സ്റ്റേഡിയങ്ങൾ, റോഡ് നിർമ്മാണ-നവീകരണ പദ്ധതികൾ എന്നിവയാണ് മുടങ്ങിയിരിക്കുന്നത്. നാല് ഘട്ടങ്ങളിലായി പൂർത്തിയാക്കേണ്ട ഈ പദ്ധതികളിൽ ടെൻഡർ കഴിഞ്ഞതും നിർമ്മാണാനുമതി ലഭിച്ചതുമായവക്ക് പുറമെ പ്രാഥമിക ഘട്ടം പോലും ആരംഭിക്കാത്തവയും ഉൾപ്പെടുന്നു.
